Presidenti francez, Francois Hollande, deklaroi të mërkurën se tre ushtarë të vendit të tij kishin humbur jetën ndërsa gjendeshin në Libi në një mision për mbledhje informacioni. Ai nuk e bëri të njohur se ku kishte ndodhur ngjarja, por tha se ushtarët vdiqën në një aksident me helikopter, teksa merrnin pjesë në “operacione të rrezikshme zbulimi”.
Deklarata e tij ka sjellë menjëherë reagimin e qeverisë libiane të mbështetur nga OKB-ja, e cila e kritikoi praninë e trupave franceze në Libi.
Prania e trupave franceze në Libi është një shkelje e sovranitetit të vendit, u shkrua në faqen elektronike të qeverisë libiane në një rrjet social.
Në të u deklarua se qeveria mirëpriste çdo ndihmë në luftën kundër ISIS-it, por se kjo ndihmë duhej bazuar në një kërkesë për organin qeverisës të Libisë, ose duhej dhënë në bashkëpunim me të.
Një sërë qytetesh u pushtuan nga qindra protestues, të cilët dolën në rrugë për të ngritur zërin kundër pranisë ushtarake franceze në vend. Tripoli dhe Misrata ishin qytetet ku u protestua më së shumti.
“Hiqni duart nga Libia,” “Jo ndërhyrjes franceze,” ishin disa nga parullat e protestuesve, ndërkohë që shumë prej tyre valëvisnin flamurin libian, e një grua dogji atë francez.
Libia gjendet prej pesë vitesh e mbërthyer nga trazira të njëpasnjëshme. Vendi nuk ka gjetur asnjëherë qetësi që prej rrëzimit dhe ekzekutimit të Muamer Gadafit. /tesheshi.com/
