Tek çështja e sistemit shëndetësor në Shqipëri, nuk është alarmant vetëm korrupsioni, mungesa e ilaçeve, kushtet mizarabël të shërbimit, por më së shumti degradimi i spitaleve në shumë rrethe, që rrezikojnë deri dhe mbylljen, pasi kuadri mjekësor nuk qaset.
Jo shëndetësia falas, por një shërbim shëndetësor normal dhe në majë të malit, do duhej të ishte premtimi bazë për sistemin në kalbje e sipër.
Më konkretisht, spitali i Laçit nuk i përket një vendi të humbur, por një vendi në zemër të Shqipërisë, treçerek ore larg Tiranës, por që rrezikon të mbyllet, pasi nuk ka specialistë, nuk ka shërbime pra.
Ndër vite, një mori specialistësh u kanë munguar pavioneve, ndërsa dikasteri ministror pati premtuar shërbim më të specializuar duke e konsideruar spitalin e këtij qyteti si nyje lidhëse për zonat veriore të vendit.
Propozimi pak viteve më parë nga ish-ministrja Anila Godo për ngritjen aty të repartit të traumave u prit me shumë interes. Ky repart do shërbente dhe për të aksidentuarit e shumtë në aksin e superstradës Tiranë – Lezhë, por ja që u harrua dhe u la tërësisht pas dore.
Dhe, ndonëse kjo nuk u realizua, një tjetër problem shqetëson pacientët e Kurbinit, e që është mungesa e mjekëve specialistë si O.R.L., Demartolog, Onkolog, Reumatolog etj.
Nga të dhënat, dy mjekë reamatologë ndodhen prej vitesh pranë qendrave shëndetësore në Laç, por nuk e ofrojnë shërbimin pranë pacientëvee në spital, duke i detyruar këta të fundit që të trannsferohen në Tiranë apo dhe në spitalin e Lezhës.
Referuar shifrave, për një numër të lartë popullsie si Kurbini me 74 mijë banorë, numri i mjekëve është mjaft i reduktuar ku krahasuar me numrin më të ulët të popullsisë në rrethin e Mirditës, ku shërbimi mjekësor njeh më shumë mjek, si pranë siptalit apo dhe në qendrat e fshatrave.
Kjo ka bërë që tek disa mjekë të spitalit të Laçit të shtohet frika e ndonjë mbylljeje të mundshme. Por ata thonë se nuk do të pranojnë një skenar, mbase të parapërgatitur në një të ardhme të afërt, për ta mbyllur spitalin ku ata shërbejnë prej vitesh.
Apeli i tyre është i qartë: në mbështetje të shërbimit shëndetësor,përmirsimin e kushteve dhe plotësimin e numrit të mjekëve dhe investime në shërbim. /tesheshi.com/
