Në Parlament sot po diskutohet buxheti, por në fakt për buxhet u fol pak, ose aspak. Nga njëra anë është hapur “libri i shpisë” për sharjet dhe nga ana tjetër stilistika e etiketimeve.
Edi Rama, ka marrë mbarë të gjithë kafshët shtëpiake duke u vënë emra deputetësh të PD-së, kurse opozita nga ana e saj, përveçse ka vazhduar ta quajë të çmendur, i kanë vënë edhe emërtesën “Ahmedinexhad”, duke e krahasuar me ish-presidentin e shumëdiskutuar të Iranit.
Rama
Në përfundim të fjalës së tij të shoqëruar me tensione në sallën e Kuvendit, kryeministri Edi Rama tha se opozita duhet ta harrojë ëndrrën për zgjedhje të parakohshme.
“Mitingun ta bëni, revolucionin ta ëndërroni. Po për sa kohë do vazhdoni të bëni mitingje duke ëndërruar revolucionin do mbeteni te llojet e vjetra të sportit që në fund të ditës do mbeteni vetëm. Që tu vinë shqiptarët prapa në atë lloj sporti, ajo kohë iku”, tha Rama.
Opozita
Fjalimi i kryeministrit është shoqëruar me batuta të herë pas hershme drejtuar deputeëtve të opozitës, që i ndërprisnin fjalën herë pas herë. “E di që ti s’ke respekt për pulat se të duket vetja më i mençur se një pulë, ndërsa unë duke të parë ty më rritet respekti për pulat”, i tha kryeministri deputetit të Shkodrës Helidon Bushati.
Në fakt Rama ka folur 4 orë rresht në prezantimin e projekt/buxhetit të vitit të ardhshëm. Kjo kohë e gjatë është bërë objekt batutash mes tij dhe kreut parlamentar të grupit të PD-së, Edi Paloka.
“Zoti kryetar ne e dëgjuam kryeministrin për 4 orë, se është bërë si Ahmedinexhadi. Unë do të doja që të mos kemi skena të tilla më në Parlament, ju duhet t’i tërhiqni vëmendjen këtij zotërisë sa herë rrëshket. Nuk është faji jonë që ai nuk di të flasë për buxhetin. Atë punën e gojës dhe zorrës nuk e ka për herë të parë sot dhe ne e kemi thënë dhe herë tjetër. i vetmi që as gojën as zorrën nuk i përdor për ato që ia ka dhënë Zoti është ai zotëria aty”, tha Paloka.
“Normalisht kur hidheni përpjetë dhe bëni akuza se dikush ju tha atë që në fakt jua tha, e merrni me mend se gjuha shkon ku dhemb dhëmbi.. minimalisht duhet të keni aftësinë që çfarë kërkoni nga tjetri ta mishëroni vetë. E mora fjalën për të kërkuar mëshirën e shumicës këtu të pranishme dhe gjithë popullit shqiptar për këtë që foli para meje (Edi Paloka), se vura re që është ora dy dhe ky ka orën që duhet të fitojë çorbën. Me ato që tha thjesht garantoi bukën e përditshme që ia jep i madhi Zot. Mëshirë për zotëriun”, iu përgjigj Rama.
/tesheshi.com/
