Në një pozitë që ndoshta vetëm në ëndërr mund ta ketë parë, atë që të jetë ai udhëheqësi i dialogut me Beogradin, procesi më i vështirë dhe më delikat në historinë e Kosovës, i cili kërkon njerëz të sprovuar në politikë e diplomaci, kryeministri Avdullah Hoti u takua me presidentin Macron në Elize.
Siç dihet, Macron e Merkel janë investitorët kryesorë të Dialogut nën ombrellë europiane, të cilin iu “rrëmbyen SHBA me anë të aktakuzës ndaj Thaçit, publikuar nga Specialja tre ditë para takimit të Uashintonit, mundësuar nga Grenell.
Në një impresion në FB, pas takimit me Macron, Hoti shkruan se Franca ka rol në zhvillimet kosovare. Për më tepër, ai tha se Macron ka pranuar një ftesë për të vizituar Kosovën.
“Shumë i nderuar me pritjen nga presidenti i Francës, Emmanuel Macron, në Pallatin Elysee në Paris.
Marrëdhëniet e Kosovës me Francën janë të shkëlqyera, ndërsa Franca ka luajtur rol kyç në të gjitha fazat e shtetndërtimit të Kosovës dhe populli i Kosovës është mirënjohës për këtë. Biseduam për zhvillimet në Kosovë dhe rajon, me fokus në perspektivën euro-integruese, si dhe për çështjen e liberalizimit të vizave për qytetarët e Kosovës.
Franca mbetet e përkushtuar për të ndihmuar Kosovën në mbështetjen e procesit të dialogut me Serbinë, i cili duhet të përfshijë njohjen reciproke dhe normalizimin e marrëdhënieve.
U pajtuam që të bashkëpunojmë për shkëmbimin e të dhënave në mes të dy ministrive të Brendshme sa i përket rendit dhe ligjit, të punohet për promovimin e shkëmbimeve ekonomike në mes Francës dhe Kosovës, si dhe të punohet për promovimin e frankofonisë në Kosovë.
Jam i lumtur që Presidenti i Francës Macron e mirëpriti ftesën për vizitë në Kosovë, e cila vizitë do të ndodhë në të ardhmen në një moment të përshtatshëm për Presidentin Macron”, shkruan Hoti.
Ky i fundit pritet të vihet përballë Vuçiçit më 12 korrik në Bruksel, në atë që është rinisje e Dialogut, me sponsorizim nga BE. /tesheshi.com/
