Nga Bashkim Kastrati
Qytetarët e Kosovës shprehin kohë pas kohe shqetësimet e tyre në lidhje me shërbimet bankare. Viteve të fundit, ata thonë se po paguajnë gjithnjë e më shumë për këto shërbime. Qytetarët shprehen të pakënaqur me koston që duhet ta paguajnë për mirëmbajtje, për tërheqje apo pranim të parave në llogarinë e tyre.
Gjithashtu, ankesa ka edhe sa i përket kredive pasi që ka shpesh mosmarrëveshje sa i përket pagesës së kestëve.
Për këtë arsye, qytetarët që janë klientë të bankave komerciale në Kosovë, por edhe të institucioneve mikrofinanciare, shpesh i drejtohen Bankës Qendrore të Kosovës (BQK) me ankesa të ndryshme.
Zëdhënësi i BQK-së, Besnik Kada ka thënë për tesheshi.com se ky institucion pranon ankesa nga me të ndryshmet, të cilat kanë të bëjnë me pakënaqësitë e tyre me bankën ku janë klientë, apo kanë pretendime se u janë shkelur të drejtat e tyre.
Sipas të dhënave që na i ka dërguar zëdhënësi Kada, rezulton se në katër vitet e fundit ka pasur rritje të trendit të ankesave. Derisa në vitin 2014 ka pasur 158 ankesa, në vitin 2017 numri i ankesave ka qenë 335. Ndërsa vetëm në tremujorin e parë të këtij viti janë paraqitur gjithsej 111 ankesa, që tregon se në bazë të këtij trendi, viti 2018 do ta tejkalojë vitin paraprak me ankesa ndaj bankave komerciale dhe institucioneve tjera mikrofinanciare.
Këtë e dëshmon edhe tabela në vijim:
Besnik Kada thotë se ankesat e qytetarëve ndaj bankave dhe institucioneve tjera relevante trajtohen me seriozitet të madh, ndërsa fton qytetarët që të adresojnë sa më shumë ankesa, kur konsiderojnë se u janë shkelur të drejtat e tyre.
“Ankesat shqyrtohen nga divizioni i ankesave të shfrytëzueseve të shërbimeve financiare. BQK bënë ekzaminime të rregullta tek institucionet financiare dhe në rast të shkeljeve, konform rregullativës në fuqi dhe kompetencave që ka, merr masa të mëtutjeshme”, thotë Kada.
Ja cilat janë ankesat më të shpeshta
Zëdhënësi Kada tregon edhe për llojet me të shpeshta të ankesave, përkatësisht pretendimeve ku bankat komerciale dhe institucionet tjera mikrofinanciare kanë bërë shkelje.
“Në fushën e bankave, ankesat më të shpeshta kanë të bëjnë me çështje të ndryshme që ndërlidhen me kredi (si p.sh. kategorizimi në regjistrin e kredive, parapagimi i kredive, etj.), çështje që ndërlidhen me llogari (si p.sh. bllokimi i llogarisë), një pjesë e ankesave kanë të bëjnë me tarifat/provizioneve bankare. Ndërsa sa i përket fushës së sigurimeve ankesat më të shpeshta kanë të bëjnë me mos kompensim të dëmit material dhe jomaterial nga sigurimi i autopërgjegjësisë TPL, mos respektimi i afateve kohore për pagesë tek marrëveshjet jashtëgjyqësore si dhe mos kompensimin e shpenzimeve mjekësore nga sigurimi shëndetësor”, theksoi Kada.
Duhet theksuar se sektori bankar mbetet ndër sektor me likuid në Kosovë, por edhe shërbimet edhe kamatat në kredi mbesin të larta.
Mbulueshmëria e kapitalit në këtë sektor është 17 për qind, derisa kufiri për likuiditet është deri në 12 për qind. Pra sipas të dhënave, sektori i bankar është likuid më shumë se që është e nevojshme.
Një dukuri që është vërejtur kohëve të fundit është digjitalizimi i shërbimeve, e që ka pasur për pasojë direkte largimin e shumë punëtorëve nga puna. Tashmë ka bankë që në disa komuna nuk ofrojnë fare shërbime direkte me personel, por vetëm i kanë aparaturat përkatëse, të cilat shërbejnë për të tërhequr, deponuar, dërguar apo transferuar para. Pra bankat po i zvogëlojnë shpenzimet e tyre për staf dhe kjo po ndodh pasi që ato kanë arritur një numër të madh të klientëve. /tesheshi.com/
