Nga Blendi Gashi
Kosova brenda një kohe të gjatë mund të shkojë në zgjedhje të parakohshme parlamentare.
Kritikat e kreut të PDK-së Kadri Veselit, njëherit kryekuvendar, ndaj qeverisë “Mustafa”, duke thënë se situata në vend nuk është normale dhe se nuk është fundi i botës nëse shkohet në zgjedhje, ka rritur apetitet e partive opozitare, njëkohësisht ka shtuar zërat në opinion se nuk ka më asnjë arsye që PDK dhe LDK të qeverisin me vendin.
Ndaj kritikave të Veselit se qeveria ka gabuar me Asociacionin dhe Demarkacionin si dhe përmendjen e opisionit për zgjedhje të reja, ende nuk ka reaguar kreu i LDK-së Isa Mustafa.
Por, kreut të PDK-së i janë kundërpërgjigjur nënkryetar të LDK-së dhe anëtarë të Kryesisë së kësaj partie të cilët thonë se partia e tyre është e gatshme për zgjedhje edhe pse mendojnë se zgjedhjet nuk janë zgjidhje për të dalë nga kriza politike.
Nënkryetari i LDK-së. Lutfi Haziri thotë se ideja për zgjedhje të reja nuk është rrugëdalje për situatën aktuale politike por LDK e PDK duhet të fokusohen te zgjidhja e problemeve me demarkacionin, liberalizimin e vizave dhe zhvillimin e ekonomik.
“Si nënkryetar i LDK-së mund të them se është një deklaratë interesante dhe lëvizje interesante politike në të njëjtën kohë, sepse marrëveshja e koalicionit, apo koalicioni i ‘Elefantëve’ nuk është lidhur mbi parimin e kalimit të Demarkacionit apo Asociacionit. Vetëm PDK s’mund ta çojë vendin në zgjedhje. Kreu i PDK-së po lyp marrëveshje me partitë politike. Edhe thotë nëse arrihet një marrëveshje me partitë politike dhe aludon më shumë te opozita. Sa i përket LDK-së, ne mendojmë, se zgjedhjet nuk janë rrugëdalja nga situata aktuale”, ka thënë Haziri, për mediat kosovare.
Pavarësisht deklaratës së nënkryetarit Haziri, deputet dhe ish-deputet të LDK-së thonë se partia e tyre duhet të jetë e përgatitur për zgjedhje dhe nuk duhet të frikësohet në asnjë mënyrë nëse një gjë të tillë e dëshirojnë kundërshtarët politikë.
Deputeti i LDK-së, Shpejtim Bulliqi, beson se partia e tij është e gatshme për çdo sfidë dhe e përgatitur për çdo situatë që mund të troket.
“Të dyja problemet sfiduese (Asociacioni dhe Demarkacioni) janë të trashëguara nga qeveria ‘Thaçi’ andaj LDK duhet të ndihet komod për zgjedhje nëse PDK dëshiron një gjë të tillë. Mendoj se LDK është shumë e gatshme për të gjitha situatat”, thotë deputeti Bulliqi, për tesheshi.com.
Ish-deputeti i LDK-së, Naser Rugova, thotë se si një nga kritikuesit e koalicionit aktual, e ka pritur një lojë dhe papërgjegjësi të PDK-së në raport me LDK-në dhe shtetin e Kosovës.
Ai thotë se është jo serioze që kryetari i partisë më të madhe në koalicion që është edhe kryetar i Kuvendit të adresojë kritika për tema që vet subjekti i tij i cili ka qeverisur me vendin për shtatë vite dhe vazhdon të jetë pjesë e qeverisë i ka filluar dhe pothuajse përfunduar siç është Asociacioni i Komunave Serbe dhe Demarkacioni i kufirit me Malin e Zi.
“Deklarimet se qeveria ka gabuar në këto tema të karakterit nacional dhe të tentosh të fajësosh dikënd për gabimet që i ke bërë vet, është më tepër se demagogji dhe amoralitet politik. Por PDK-ja dhe kryetari i saj vetëm se po e tregojnë planin e kahmotshëm që ta akuzojnë LDK-në për këto tema të nxehta politike dhe po përgatiten që sa më parë të shkojnë në zgjedhje dhe t’i ikin përgjegjësisë politike dhe institucionale por edhe tentojnë të krijojnë vakum instucional edhe para fillimit të Gjykatës Speciale. LDK-ja duhet të jetë e vëmendshme dhe në raste të tilla edhe merren vendime racionale por të guximshme”, thotë Rugova, për tesheshi.com.
Ish-deputeti i LDK-së, thotë se partia e tij duhet të përgatitet për garën zgjedhore dhe nuk duhet të frikësohet fare nga zgjedhjet eventuale.
“Një unitet elektoral dhe i strukturave partiake, një hapje më e madhe ndaj njerëzve me vlera dhe që njifen në opinion si brum i LDK-së në cilëndo sfidë zgjedhore LDK mund të del e para. Pas këtyre deklarimeve të kryetarit të PDK-së asnjë veprim për temat e rëndësisë nacionale si Asociacioni dhe Demarkacioni, LDK nuk duhet të merr vendime pa koncensus të plotë nacional”, thotë Rugova.
“Të shkohet në zgjedhje të reja”
Pas deklaratave të Veselit, janë deklaruar edhe opozitarë dhe deputet të pavarur, të cilët thonë se vendi duhet sa më parë të shkojë në zgjedhje të reja.
Deputeti i pavarur, Gëzim Kelmendi, thotë se pas deklaratës së Kadri Veselit, koalicionit PDK-LDK i ka dalë afati
“Kritikat për Qeverinë Mustafa se ka gabuar me Asociacionin dhe ka dështuar në ekonomi, është tregues i qartë se këtij koalicioni i ka dalë afati.
Çdo ditë e më shumë që vazhdon ky koalicion, i bën dëm Kosovës, dhe Kadri Veseli si Kryetar i PDK-së (partisë më të madhe në vend) mban përgjegjësi nëse lejon të fundoset edhe më shumë Kosova”, thotë Kelmendi.
Edhe anëtari i Kryesisë së Nisma-s për Kosovën, Bajram Hasani, thotë se pas pranimit nga Veseli për dështim të koalicionit është e pakuptimtë që qeveria aktuale të vazhdoj punën më tej .
“Ne presim qëndrim të njëjtë edhe nga LDK-ja. Ata nuk duhet të frikësohen nga qytetari. Na vjen mirë që më në fund edhe vet PDK e paska pranuar se duhet të bëhen ndryshime në qeverisje. Është koha e fundit që kjo qeveri të shkojë dhe qytetarët të vendosin për një alternativë më të mirë, që të zgjedhin një qeveri që do të mund të kryente punët e veta dhe të krijonte kushte për një jetë më të mirë për qytetarët”, thotë Hasani. /tesheshi.com/
