Nga Donat Maloku
Klina është një qytezë e vogël në veriperëndim të Kosovës, me sipërfaqe 308 m2. Ky qytet është shembull për marrëdhëniet ndërfetare dhe ndëretnike.
Prijësit fetar, ai mysliman Fitim Bojaj, dhe ai katolik, Don Lenci, kanë pohuar se nuk do të lejojnë që askush të prishe marrëdhëniet e mira ndërfetare të krijuara në ketë komunë.
Kryetari i Komunës së Klinës, Sokol Bashota, në takimin e Këshillit Komunal për Siguri të Bashkësive (KKSB) ka thënë se nga 51 mijë banorë sa ka Komuna që ai udhëheq 38 mijë janë rezidentë. Ai tregoi se në ketë komunë jetojnë të gjitha komunitetet dhe se harmonia, sidomos ajo fetare, është shembull i mirë. “Klina është shembull për marrëdhënie të mira ndërfetare, nuk e kemi pasur as edhe një problem të vogël të kësaj natyre. Kjo është dëshmuar me së miri me organizimin e aktiviteteve sportive për festat fetare të besimtarëve myslimanë dhe katolikë ku bashkërisht kanë festuar të dy konfeksionet”, pohoi Bashota sipas të cilit edhe marrëdhëniet ndëretnike janë të mira dhe ka lëvizje të lirë të gjithë qytetarëve pa dallim etnie. Ai përmendi disa raste të sulmit ndaj pronave serbe nga disa individ të cilët tashme janë duke u përballur me drejtësinë. Bashota falënderoi Policinë e Kosovës, Stacionin në Klinë për zbardhjen e këtyre rasteve dhe ka thënë se ato raste kanë qenë të vogla dhe nuk e kanë prishur sigurinë e përgjithshme në ketë komunë. “ Komuniteti serb ndihët me i sigurt pas zbardhjes së këtyre rasteve”, tha kryetari Bashota. Sipas tij, në 17 fshatra ka serb të kthyer dhe të komunitete të tjera, romë, ashkali dhe egjiptas të cilët jetojnë mirë edhe me fqinjët e tyre në fshatrat e përziera multietnike. “Jemi në proces të kthimit për të gjithë ata qytetarë që duan të jetojnë në pronat e tyre kurse Komuna ofron siguri për të gjithë qytetarët”, u shpreh Bashota, duke thënë se shtëpitë e serbëve që janë ndërtuar po lihen të zbrazëta dhe ato janë cak i sulmuesve për përfitime personale.
Ministri i Punëve të Brendshme, gjatë vizitës që i bëri Komunës së Klinës pohoi se nëpër komuna ka dëgjuar se ka trend të rënies së rasteve të krimit dhe kjo është falë punës profesionale të policisë dhe qytetarëve. “ Radikalizmi dhe ekstremizmi i dhunshëm fetar, aktet terroriste, sot janë shqetësim për gjithë botën, por edhe për vendin tonë. Klina shquhet si vend multinacional, etnik dhe fetar. Kosova ka nevojë për mesazh të paqes dhe mirëkuptimit ndërfetar e ndëretnik. Shqiptarët shquhen për këto vlera. Radikalizmi fetar është i papranueshëm për shoqërinë kosovare”, ka thënë ministri Hyseni i cili ftoi të gjitha komunitetet pa dallim etnie dhe fetare të punojnë bashkë në parandalimin e kësaj të keqe. “Nuk ka asnjë lloj paniku për raste të tilla në vendin tonë, institucionet e sigurisë deri me tash e kanë kryer punën si duhet, por duhet të jemi vigjilent të gjithë”, porositi Hyseni.
Komandanti i Stacionit të Policisë në Klinë, Rexhë Berisha, njoftoi se në gjashtë mujorin e parë policia ka realizuar objektivat e veta dhe se çdo qytetar i Klinës lëviz lirshëm. Sipas tij policia ka zbardhur 65 për qind të rasteve të raportuara nga serbët. “ Në komunën e Klinës nuk ka vend për shqetësim, siguria është e mirë, policia është e përkushtuar të krijoj siguri për të gjithë qytetarët”, ka thënë Rexhë Berisha.
Millorad Sharkoviq, përfaqësues i serbëve në KKSB, njëherësh edhe shef i Zyrës së Kthimit në Komunën e Klinës, pohoi se vizita e Hysenit dhe Maxhunit, i përforcon përpjekjet e organeve relevante për sigurinë e komunitetit tonë. “ Komuniteti jo shumicë, është pozitivisht i diskriminuar dhe siguria është në nivel të duhur”, tha Sharkoviq. /tesheshi.com/
