Udhëheqësi i opozitës ruse Alexei Navalny tha se substanca helmuese “Novichok” u gjet në trupin e tij dhe mbi të, duke kërkuar nga Moska të kthente rrobat që kishte veshur ditën kur u helmua dhe e cila është “prova kryesore”.
“Para se të më jepej transporti për në Gjermani, ata më hoqën rrobat dhe më dërguan krejtësisht të zhveshur. Duke pasur parasysh që agjenti nervor u gjet në trupin tim dhe se një infeksion kontakti ishte i mundur, rrobat janë provë materiale shumë e rëndësishme,” shkroi Navalny në blogun e tij ndërsa po shërohet në një spital në Berlin.
“Unë po kërkoj që rrobat të paketohen me kujdes në një qese plastike dhe të kthehen tek unë”, shtoi udhëheqësi i opozitës, një kritik i Kremlinit, raporton AFP.
Navalny, i cili u sëmur në një fluturim të brendshëm në Rusi më 20 gusht, u shtrua në një spital në Siberi dhe më pas u transportua në Gjermani, ku u zbulua se ishte helmuar nga “Novichok”, një helm nervor i prodhuar nga ekspertët sovjetikë për qëllime ushtarake.
Moska e hodhi poshtë atë mundësi, megjithë përfundimet e laboratorëve gjermanë, francezë dhe suedezë kanë konfirmuar burimin e helmimit.
Bashkëpunëtorët e ngushtë të Navalny-it thanë se gjurmët e agjenit të epokës sovjetike u zbuluan në një shishe uji të gjetur në dhomën e tij të hotelit në Siberi.
Në një postim tjetër në Instagram, Navalni i dha nderime gruas së tij Julia, e cila “ishte me të gjatë tre javëve që ishte në koma, duke i kënduar atij dhe duke luajtur muzikë”.
“Tani e di me siguri nga përvoja personale që dashuria shëron dhe rikthen në jetë,” shtoi kryeopozitari rus. /tesheshi.com/
