Siç dihet tashmë prej ditësh, kreu i opozitës, Lulzim Basha, ka paralajmëruar nisjen e një stine protesta të cilat do startojnë me datë 18 të këtij muaji. Madje i gjithë lidershipi i PD-së po investohet fuqishëm për të injektuar tek elektorati shqiptar atë që po ndodh në Rumani këto ditë. Por realisht, edhe pse arsyet për të protestuar në këtë vend ekzistojnë në çdo kohë, kanë ekzistuar po aq fuqishëm dhe gjatë qeverisjes së djathtëve, a e ka kauzën e duhur PD-ja për të dalë në rrugë dhe a do mundet ta rrëzojë nga rruga qeverisjen e Ramës?
Kryetari i ri i Partisë Demokratike, Lulzim Basha, ka planifikuar një protestë të madhe politike më 18 Shkurt kundër qeverisë. Protesta do të mbahet në një situatë politike të tensionuar; kur dy aleatët qeverisës janë drejt ndarjes dhe kur Vetingu po nis dhe Reforma në Drejtësi e inicuar dhe vrojtuar nga ndërkombëtarët synon të kapë “peshqit e mëdhenj” të korrupsionit. Por duket se protesta e opozitës s’ka lidhje me asnjërën nga këto ngjarje.
Basha po merr zemër nga protestat në Rumani, ku qindra-mijëra qyetarë, të pathirrur nga asnjë parti politike, kanë dalë në shesh për t’i bërë presion qeverisë që të mos amendojë nenet e ligjit që nuk lejon të akuzuarit për korrupsion të futen në politikë. Edhe pse qeveria u tërhoq ata vazhdojnë të protestojnë deri në dorëheqjen e kryeministrit.
Duket qartë se kauzat nuk janë të ngjashme dhe as kanë lidhje me njëra-tjetrën; Basha kërkon nga ana e tij protesta kundër qeverisë për premtimet e pambajtura në 4 vite dhe kundër vjedhjes së zgjedhjeve, e cila rezulton si një “frikë” e tij paraprake ose si justifikim për humbjen e zgjedhjeve të 18 qershorit.
Shqipëria nuk është në situatën e Rumanisë ku vettingu i ka dhënë rezultatet e tij dhe qeveria mundohet ta zbusë atë; këtu akoma s’ka nisur. Për më tepër, qëndrimi i Bashës ndaj reformës në Drejtësi dhe vettingut është jo fort i qartë; e para ai inicioi rrëzimin e disa ligjeve të rëndësishme të vettingut në Gjykatë Kushtetuese; e dyta shumë nga gjykatësit që po ikin prej vettingut njihen si të afërt me të djathtën dhe ish-kryeministrin Berisha, i cili vazhdon të ketë një rol të fortë në PD; e treta, Basha nuk mbajti dot një qëndrim të qartë për rastin “Llalla-Lu”, kur kryeprokurori u akuzua nga ambasadori amerikan se po pengonte këtë reformë. Ai nuk u distancua dot nga kryeprokurori i zgjedhur nga Berisha dhe Meta.
Nga ana tjetër, vettingu, nëse bëhet, mund të rezultojë fatal dhe për vetë partinë e Bashës, pasi ish-ministra të kësaj partie që vazhdojnë të jenë në kupolën e saj, janë akuzuar për korrupsion.
Pra, Basha nuk po i thërret shqiptarët në protestë për të mbështetur Reformën në Drejtësi që do të pastrojë sistemin e Drejtësisë për t’i hapur rrugë patrimit të politikës nga politikanët e korruptuar.
Atëherë çfarë po kërkon me protestat?!
Protesta, si mënyrë për të matur elektoratin
Po të shikosh ligjërimin e këtyre ditëve të kryetarit të opozitës ngjan me një fushatë elektorale të nisur para kohe. Partia Demokratike shënoi një nga humbjet më të thella të saj në vitin 2013 pas 8 vitesh në qeverisje dhe ky është momenti i parë kur kjo parti, tashmë me një kryetar të ri, duhet të provojë veten në elektorat. Protesta e 18 shkurtit dhe të tjerat nëse do të ketë do të jenë një barometër që Basha të shohë ku është opozita; sa elektorat ka? Sa frymëzon? Sa besim kanë njerëzit tek ajo?
“Më 18 shkurt shqiptarët do të afrohen për t’i thënë jo padrejtësisë, varfërisë, gënjeshtrës, dhe për të diktuar zgjedhje të lira dhe të ndershme. Kudo në Shqipëri e në Fier ka pllakosur varfëria. Të tjera gjëra premtoi Rilindja të tjera bëri. Premtoi ulje taksash për shumicën e shqiptarëve, energji me çmim më të ulët, e 300 mijë vende pune, sot kemi më shumë të papunë, shëndetësia është në gjëndje të mjerë, rinia ka më pak shanse në punësim. E gjitha kjo vjen sepse qeveria braktisi qytetarët dhe po i shërben vetes së vet”- u shpreh Basha në takimin e sotëm në Fier, në vazhdën e takimeve paraprake për të nxitur bazën e partisë dhe qytetarët që t’i vijnë me datë 18 në Tiranë. Është një fjalim tipik elektoral që mund të mbahej gjatë muajit zyrtar të fushatës.
Alibia e humbjes së zgjedhjeve
Duke qenë një opozitë e pazëshme këto 4 vite, PD-ja prej disa javësh ka nisur të ngrejë alibinë e humbjes së zgjedhjeve me vjedhjen e tyre. Këtë gjë bëri Edi Rama në zgjedhjet e 2009-ës, por pas zgjedhjeve, me sloganin “Hapni kutitë!”
Por a është e justifikuar frika e Bashës?!
Ai këmbëngul tek votimi elektronik si një faktor për besueshmërinë e zgjedhjeve. Por këtë argument ia ka rërzuar vetë OSBE-ja, zyra monitoruese e zgjedhjeve, e cila deklaroi se ky lloj votimi është i pamundur të realizohet nga ana teknike. PD-ja e injoroi totalisht një reformë reale zgjedhore nëse do të kishte kaq shumë interes, pasi komisioni i posaçëm parlamentar i ngritur 6 muaj më parë nuk funksionoi asnjë ditë.
Retorika për zgjedhje të lira dhe të ndershme nuk ngjit më që pas vitit famëkeq 1996 kur zgjedhjet e zhvilluara nga Partia Demokratike në pushtet nuk u njohën nga opozita dhe ndërkombëtarët. Që prej atëherë ka pasur probleme në zgjedhje, janë kontestuar, por janë njohur dhe janë cilësuar të lira.
Aryet të tjera, për të cilat Basha u kërkon shqiptarëve të protestojnë si varfëria, taksat, dekriminalizimi i politikës etj., mund të ishin shumë mirë pjesë të programit të tij elektoral si premtime për të marrë votat e tyre më 18 qershor. /tesheshi.com/
