Ka ca vende Kosova që dalëngadalë po shndërrohen në oaze turistike. E tillë është komuna e Junikut. Deri dje në ato anë vinte era barut, prej betejave të UÇK-së me serbët; ndërsa sot është krejt ndryshe: vjen era lule!
Maja e Gjeravicës me dy liqenj natyrorë, lumi Erenik, Moronica, kullat, teqetë, pa harruar dhe bjeshkët, po tërheqin gjithnjë e më shumë vizitorë.
Menaxherja e Qendrës Informative Turistike “Shifemi n’Dukagjin”, Blerina Sallaj, tregon për tesheshi.com se si Juniku po fiton një tjetër status, falë bukurive….
Intervistoi: Blendi Gashi
Juniku dihet se është një nga komunat me potencial të madh turistik. A mund të na tregoni cilat janë zonat më të vizituara? Pra, çka ofron Juniku për vizitorët? Pse duhet ta vizitojnë?
Jo rastësisht Juniku dhe rajoni perëndimor i Kosovës njihet si zonë apo qendër e turizmit, për çka edhe ka krijuar identietin. Juniku është i bekuar nga Zoti për bukuritë natyrore që gëzon siç janë: maja më e lartë në Kosovë, maja e Gjeravicës me lartësi 2565 metra mbiedetare dhe me një bukuri të veçantë me dy liqenjë në afërsi të njohur si liqenjtë e Gjeravicës ku nga njëri ka burimin lumi Erenik që kalon përgjatë qytetit të Junikut, ujvara, kanjone, shkëmbinjë të veçantë, faunë të pasur, parkun Moronica me shtigje për vrapim dhe ecje, por gjithashtu edhe trashëgimia e pasur kulturore Junikut i jep dhe më shumë shije, si kullat Dukagjinase që kanë qenë simbol i qëndresës dhe mikëpritjes, gjithashtu edhe trashëgimia fetare ku ka xhaminë në model kullë të ndërtuar në vitin 1571 Xhamia e Qokut dhe teqja më e madhe në Ballkan e Sheh Xhaferit.
Sa vizitorë ka pasur këtë verë dhe a ka rritje krahasuar me vitin e kaluar?
Është e vështirë ne si organizatë të bëjmë matje të saktë të numrit të turistëve sepse kjo duhet të bëhet nga politikat që krijojnë istitucionet qendrore, që gjatë hyrjeve kufitare apo në airoport të identifikohen turistët dhe destinacioni i tyre. Ç’është e mira ka trend të rritjes së vizitorëve dhe këtë e identifikojmë nga turistët që kërkojnë informacion nga ne si Qendër Informative Turistike.
Nga cilat shtete ka më shumë vizitorë? Sa nga Shqipëria, Gjermania etj… (nëse keni të dhëna më të detajuara)?
Më gëzojnë dy fakte. I pari që është krijuar kultura që qytetarët e Kosovës dhe diaspora të vizitojnë bukuritë e vendit, konkretisht Junikun ku përveç atraksioneve natyrore që shohin mësojmë edhe për të kaluarën, kulturën dhe traditën e vendit. Fakti i dytë është që dhe shqiptarët nga Shqipëria kanë filluar të praktikojnë që Kosovën ta kenë si destinacion për ta vizituar.
Numri më i madh i turistëve janë nga Europa vendet gjermanofolëse si Gjermania, Zvicra që përbëjnë numrin më të madh të turistëve, pavarsisht që Zvicra njihet për alpet të bukura, trashëgimia natyrore kulturore dhe mikëpritja që gjejnë në Junik i bënë zviceranët për të vizituar Junikun dhe më shumë se një herë.
Po stinën e dimrit sa ka vizitorë, kur dihet se bjeshkët janë të përshtatshme për zhvillimin e sporteve dimërore dhe rekreative (ngjitje në bjeshkë)?
Infrastruktuara bën që gjatë stinës së dimrit të ketë më pak vizitorë pasiqë qasja deri në bjeshkë është e vështirë, mirpo kjo nuk do të thotë që do të ndikon në ngecje të Junikut në fushën e turizmit sa i përket sezonit dimëror.
Shumë shpejt Juniku do të njihet si ndër ose ndoshta vendi më atraktiv për sporte dimërore në Ballkan sepse edhe në këtë pikë ka veçantit që nuk i gëzon çdo vend tjetër. Ka rreshje të mëdha bore dhe mundësi minimale për ortek, andaj këto dy fakte shumë shpejt do ta bëjnë Junikun të njohur për sporte dimërore dhe sporte dimërore ekstreme.
Sa janë bërë investime në këtë zonë turisitke? A është bërë ndonjë investim këtë vit apo parashihet ndonjë për vitin e ardhshëm ?
Një investim që vlen të theksohet është ZipLine që kalon mbi lumin Erenik, fushë rekreative sporti, shtigje për ecje dhe ciklizëm, projekte këto që kanë pasuruar ofertën turistike të Junikut. Por duke ditur se fusha e turizmit do punë sistematike dhe patjetër që do të vazhdohet të punohet me një ritëm akoma më të madh në vitet në vazhdim.
Ju si qendër informative sa ndihmoni vizitorët?
Marrë parasysh që jemi kontakti i parë që kanë turistët me Junikun apo me Kosovën, japim maksimumin që turisti së pari të ndihet sigurt dhe i afërt me ne, që turistit t’ia heqim nga mendja se Kosova është një vend i dalë nga lufta para disa viteve. Pastaj mundohemi që t’iu bëjmë të lehtë qëndrimin në Junik, rajon apo Kosovë duke i lidhur me akterët që veprojnë dhe ofrojnë shërbime në fushën e turizmit, i kursejmë turistet nga pritjet dhe malltretimet. Punën tonë e lehtëson fakti që Juniku është vend i qetë dhe i sigurt por gjithashtu fakti që kemi bashkëpuntor të mirë kjo na ndihmon që edhe ne të dalim shumë mirë para turistëve. /tesheshi.com/
