Në Izrael, vendin në të cilin muslimanët dhe hebrenjtë kanë konflikte të vazhdueshme me njëri-tjetrin, ekziston një habi dhe befasi në lidhje me vendimin e kryebashkiakëve të një numri të madh të qyteteve bregdetare të Francës për ndalimin e burkinit nëpër plazhe.
Gjykata e lartë administrative e Francës vendosi të premten kundër ndalesës së burkinit, por kryebashkiakët e disa qyteteve, përkundër kësaj, kanë thënë se nuk do t’i përmbahen vendimit gjyqësor.
Ndërsa në Izrael, aty ku ka dallime të thella doktrinore dhe politike midis popullatës hebreje dhe asaj muslimane, ndodh që situata akoma nuk ka ardhur deri në atë pikë sa të ndalohet veshja e dikujt në baza fetare.
“Është shumë qesharake të shohësh njerëzit të cilët mendojnë se janë aq liberalë apo të hapur, e nga ana tjetër nuk mund të durojnë fetë e tjera dhe ndjenjat e njerëzve të tjerë”, thotë Ruti Solomon, një grua hebreje nga Izreali teksa po shijon rrezet e diellit në një plazh në Tel Aviv.
Prapa saj, disa femra muslimane të veshura me atë që tashmë njihet si burkini, po shijojnë ujin e detit, kurse disa tjera të relaksuara pushojnë në rërën e plazhit.
“Kam dëgjuar për atë që po ndodh në Evropë”, thotë Shams al-Duha Alayyan, një muslimane me burkini e cila ka ardhur në plazh nga Jerusalemi. “Kjo është liri personale. Nëse unë dëshiroj të mbuloj trupin tim, atëherë përse nuk mund ta bëjë këtë?!”
Sigurisht, edhe Izraeli ka të veçantat e veta. Popullata hebreje ortodokse e shijon bregdetin po aq sa edhe pjesa tjetër e popullatës, por ndaraz prej tjerëve, jo vetëm e veçuar me rrethim nga pjesa tjetër e plazhistëve, por edhe u duke ndarë në turne mes vedi: një ditë për meshkuj, një ditë për femra.
Hapat e Francës kundër burkinit vijnë pas një seri terroriste. Por ndërsa plazhistët izraelitë pajtohen me nevojën për të forcuar sigurinë atje, ata thonë se është gabuar objektivi.
“Franca po ballafaqohet me një problem të madh për momentin”, thotë Shiran Rokban, vizitore në Tel Aviv. “Ata duhet të ballafaqohen me problemet reale atje, e jo me burkinin dhe gjëra të tjera plazhi”, ironizon ajo. /tesheshi.com/
