Të shqetësuara nga rastet e shfaqjes së fruthit gjatë këtij viti, si dhe nga një rënie e përqindjes së vaksinimit, autoritetet qeverisëse në Itali kanë vendosur që fëmijët duhet të kryejnë vaksinime për 12 lloje sëmundjesh përpara se të nisin të regjistrohen në shkolla shtetërore.
E nëse ngjet që fëmijët të mos jenë vaksinuar gjer në moshën gjashtë vjeç, atëherë kur nis dhe shkollimi i tyre, prindërit e tyre do të gjobiten.
Kryeministri i vendit ka fajësuar përhapjen e teorive antishkencore për rënien e vaksinimeve mes fëmijëve.
“Mungesa e masave të duhura përgjatë viteve, si dhe përhapja e teorive antishkencore, veçanërisht në muajt e fundit, ka sjellë një zvogëlim në mbrojtje,” deklaroi Paolo Gentiloni një ditë më parë në një konferencë shtypi.
Një tjetër anëtare e qeverisë italiane, ministrja e Shëndetësisë, Beatrice Lorenzin, do të thoshte: “Ne po i dërgojmë publikut një mesazh shumë të fortë.”
Posaçërisht numri i dyvjeçarëve në Itali të vaksinuar për fruthin ka rënë në 80%, në një kohë që ka qenë më tepër se 90%. Organizata Botërore e Shëndetësisë rekomandon një mbulim në 95% e më shumë të vaksinimit për këtë sëmundje. /tesheshi.com/
