Në Hungari, këtë të hënën hyn në fuqi ligji sipas të cilit të pastrehëve u ndalohet qëndrimi në vende publike, përfshirë dhe fjetjen apo kalimin e natës, një masë që për Kombet e Bashkuara është klasifikuar si “mizore”.
Amendamenti kushtetues i miratuar nga parlamenti hungarez më 20 qershor, ndalon njerëzit e pastrehë në vende publike.
Policia detyrohet që të heqë strehimet e improvizuara të të pastrehëve në vendet publike duke nisur që sot.
“Ligji ka për qëllim që të mbrojë interesat e shoqërisë si një e tërë, tha zyrtari hungarez i Çështjeve Sociale”, Attila Fulop dhe shtoi se të pastrehët nuk duhet të jenë në rrugë gjatë natës, pasi qytetarët duhet të lëvizin të lirë, pa pengesa.
Por Sekretarja e Përgjithshme e OKB-së për Çështjet Sociale, Leilani Farha tha se ligji ishte mizor dhe nuk përputhej me standardet ndërkombëtare të të drejtave të njeriut.
Në shtator, Parlamenti Europian filloi një procedurë të rrallë sanksionuese kundër Hungarisë, duke e akuzuar për minimin e vlerave demokratike të Bashkimit Evropian dhe sundimin e ligjit.
Raporti i paraqitur para PE përpara votimit përmend, ndër të tjera, edhe situatën me personat e pastrehë në Hungari. /tesheshi.com/
