Që kur u mbyll hambari Lazarat i të ardhurave nga kanabisi, Gjirokastra nisi rëniën e madhe. Sot, për shumëkënd në Gjirokastër, qyteti ka mbarruar. Kjo, referuar faktit se është qyteti me ikjet më të mëdha vitet e fundit, me një universitet me gjithnjë e më pak studentë, si dhe me një mbyllje biznesesh në vështrim të parë, sidomos në pjesën universitare rreth stadiumit.
Kjo panoramë e trishtë e një ndër qyteteve më të bukura shqiptare, në fakt shkon kundër një tabloje tjetër, atë të investimeve urbane, me një infrastrukturë dhe cilësi jete, veç të ardhurave më të pakta (sidomos prej efektit “Lazarat”), të pakrahasueshme me të djeshmen.
Por Rama, mendon ndryshe.
“Gjirokastra nga një organizëm në agoni, është kthyer në një organizëm të gjallë. Këtu ne ishim në një shembull tipik të një gërmadhe, pasi nuk kishte as dyer e as dritare dhe është transformuar tashmë. Janë 106 biznese të reja që kanë aktivitet fitimprurës. Këtu kemi një sërë investimesh që do sjellin jetë në Gjirokastër. Është një organizëm që është zgjuar pas një agonie, i duhet kohë për të vrapuar. E ardhmja do jetë e shkëlqyer për Gjirokastrën.
Sfida është për t’i dhënë jetë universitare. Këtu universiteti është sfidë pasi ka një krizë studentësh”, tha i pari i qeverisë, duke vizatuar kështu një tjetër qytet nga ai që po përjetojnë apo perceptojnë një pjesë jo e vogël e qytetarëve të atyshëm.
Rama vlerësoi atë që ai beson se do jetë Gjirokastra e se nesërmes, sidomos pasi të merret në dorë nga turqit.
“Gjirokastra do të vijojë në një nivel tjetër. Do të bëjmë parkingun e madh, që do të mundojë jo vetëm të ketë një fluks të madh turistësh, që pritet të vijnë pas pandemisë, si dhe do të bëjmë qendrën historike këmbësore, me By Pass-i e ri, që do të fillojë shumë shpejt së ndërtuari, është vetëm çështje ditësh.
Projekt tjetër është sistemimi i atyre shtëpive që janë ndërtuar me shtesa abuzive, që do të legalizohen.
Me qeverinë turke kemi bërë një marrëveshje për të bërë një investim të konsiderueshëm në një tjetër zonë të Gjirokastrës, me një tjetër grup të konsiderueshëm shtëpisë, për të mos lënë që vlerat arkitektonike të mos degradojnë”, tha Rama.
Por duhet theksuar ajo që përbën paradoksin më të madh nën qeverisjen e Ramës, edhe në plan kombëtar, ku Gjirokastra është një simbol i këtij paradoksi: padyshim që është investuar shumë dhe, në planin aparencial ka një transformim, duhet thënë të jashtëzakonshëm, por sensi entuziast i jetës është zëvëndësuar nga një ndjenjë dëshpërimi. /tesheshi.com/
