Që tani që ka hyrë 2018-ta, në Gjermani do të fillojë të zbatohet një ligj i cili kërkon nga mediat sociale në internet që të heqin menjëherë përmbajtjet e urrejtjes, lajmet e rreme dhe përmbajtjet e tjera ilegale, njoftojnë agjencitë.
Rrjetet sociale që nuk heqin postimet “e qarta ilegale” të përdoruesve mund të dënohen deri në 50 milionë euro.
Ligji parashikon që rrjetet duhet të përgjigjen brenda 24 orëve pas paralajmërimit të publikimit të përmbajtjes ilegale. Ligji i referohet rrjeteve sociale dhe portaleve mediale me më shumë se dy milionë përdorues.
Fokusi është në Facebook, Tëitter dhe YouTube, por ndoshta do të përfshijë edhe Reddit, Tumblr dhe rrjetin social rus VK.
Vimeo dhe Flickr mund të përfshihen po ashtu.
Ligji (NetzDG) u miratua në fund të qershorit 2017, dhe hyri në fuqi në fillim të tetorit. Rrjeteve sociale u është dhënë afat deri në fund të vitit të kaluar për t’u përgatitur për zbatimin e saj.
Ky kontroll strikte i mediave sociale u prezantua pas disa rasteve të mëdha të përhapjes së lajmeve të rreme dhe të mesazheve raciste nëpërmjet degëve gjermane të mediave sociale të popullarizuara.
Ministria e Drejtësisë e Gjermanisë ka njoftuar se do të publikojë formularët në faqen e saj të internetit, përmes të cilave qytetarët mund të raportojnë përmbajtje që nuk janë të lejuara me ligj ose që nuk janë hequr në kohë.
Ligji kërkon që mediat sociale të reagojnë shpejt dhe të prezantojnë një strukturë gjithëpërfshirëse të ankesave, në mënyrë që zbulimet e diskutueshme të mund të raportohen shpejt tek punonjësit e tyre.
Shumica e materialeve do të duhet të hiqen brenda 24 orëve dhe në “raste komplekse” brenda shtatë ditëve.
Facebook ka punësuar qindra njerëz në Gjermani për të trajtuar raportet e përmbajtjes që nuk janë në përputhje me ligjin dhe për të ndjekur më mirë postimet e përdoruesve.
Ligji ka provokuar polemika në këtë shtet evropian, sepse disa mendojnë se kjo mund të çojë në censurë pa qëllim dhe duke kufizuar lirinë e fjalës.
Ligji gjerman është shembulli më ekstrem i një përpjekjeje nga qeveritë dhe rregullatorët për të frenuar mediat sociale në aspektin e gjuhës së urrejtjes.
Komisioni Evropian gjithashtu lëshoi udhëzime në të cilat u bën thirrje mediave sociale për të përshpejtuar heqjen e përmbajtjeve të papërshtatshme. /tesheshi.com/
