Azilkërkuesit në Gjermani që kanë mundësi të pakta për të fituar azilin do të trajtohen tani e tutje në qendra të posaçme për ta.
Kjo është marrëveshja mes partnerëve të koalicionit qeverisës në Gjermani, e arritur ditën e djeshme. Rënia në një mendim u arrit pas javësh të tëra diskutimesh e propozimesh, mes të cilëve ai për të ngritur “zona tranziti” në kufi, ku azilkërkuesit me mundësi të pakta për ta fituar statusin e azilantit nuk do të lejoheshin as të hynin në vend.
Ngritja e qendrave bëhet për të përshpejtuar procesin e aplikimit të kërkesave dhe të përgjigjeve për to në pak kohë, e jo në muaj të tërë, siç ka qenë deri më tani.
Tre apo pesë qendra do të jenë për personat që vijnë nga vendet të konsideruara të “sigurta”, ku përfshihen dhe Shqipëria e Kosova.
Rregullat për këta azilkërkues të shtënë në këto qendra do të jenë të ngurta, dhe shkelja e tyre do të sjellë pezullimin e procesit të aplikimit të kërkesës për azil, e përsëritja do të shoqërohet me deportim.
Të përballur me një valë të pandalur refugjatësh të ardhur nga Siria, autoritetet gjermane kërkojnë që përmes masave të reja të frenojnë ardhjen e personave nga vende të cilësuara të sigurta. /tesheshi.com/
