Një atentat i tipit mafioz tronditi të këtë të dielë Shqipërinë, me vrasjen e tre të rinjve. Ngjarja e rëndë ndodhi në aksin Fushë Krujë – Milot.
Një breshëri me armë zjarri në drejtim të një automjeti tip Volsëagen Passat, i cili më pas u përfshi nga flakët, u morri jetën Diklen Vatës, Brilant Martinajt dhe Besmir Hoxhës.
Autorët dyshohet të kenë qenë katër veta, që më pas kanë djegur automjetin e tyre për të zhdukur gjurmët,
“Në aksin rrugor Fushë Krujë-Thumanë, te mbikalimi i Fushë Krujës, dyshohet se në drejtim të një automjeti tip Volswagen Passat është qëlluar me armë zjarri. Si pasojë automjeti ka marrë flakë dhe janë djegur në automjet dy shtetas ende të pa identifikuar.
Gjithashtu, nga të shtënat ka mbetur i vrarë dhe shtetasi D. V., 30 vjeç, nga Fushë Mamurrasi, i cili ka qenë pasagjer por ka mundur të dalë nga automjeti, dhe ka humbur jetën sapo ka dalë prej tij.
Në vendngjarje ndodhet grupi hetimor dhe forca të shumta Policie. Nga krehja e zonës, në Larushkë, është gjetur duke u djegur një automjet tip “Volswagen Passat” që dyshohet se është i autorëve.
Në brendësi të automjetit është konstatuar një armë zjarri automatike që dyshohet se është përdorur nga autori/ët për të kryer krimin. Në ndihmë të Policisë vendore kanë shkuar grupe të FNSh Tiranë dhe janë ngritur pika kontrolli nga DVP Tiranë e Lezhë. Grupi hetimor nën drejtimin e Prokurorisë së Rrethit Gjyqësor Krujë, po punon për identifikimin e dy shtetasve të djegur në automjet dhe për sqarimin e rrethanave të ngjarjes, sekuestrimin e cdo prove të vlefshme që do ti shërbejë zbardhjes së ngjarjes dhe identifikimit të autorëve”, thuhet në deklaratën e Policisë. /tesheshi.com/
