Gjermania ka arritur ta mposhtë Italinë për herë të parë në veprimtaritë e mëdha futbollistike. E ka bërë këtë në një natë të kthyer në një dramë 11-metërshash, ku fati ka qenë me gjermanët.
Çerekfinalja e Euro 2016-tës mes Gjermanisë dhe Italisë qe përcaktuar që më herët si finalja e parakohshme. Dhe e tillë ka rezultuar.
Në një takim shumë taktik, gjermanët kanë qenë më dominues, me më shumë vështrim nga porta kundërshtare. Presioni i tyre i njëtrajtshëm do të konkretizohej në minutën e 65-të, kur Mesut Ozil do të shënonte në portën e Buffon-it.
U duk se gjermanët po shkonin drejt fitores, kur Boateng e ka prekur në mënyrë të panevojshme topin me dorë brenda zonës së tij. Bonucci e ka kthyer në gol penalltinë e akorduar në minutën e 78-të.
Rezultati 1-1 nuk do të ndryshonte as pas shtesave nga 15 minuta. Kështu, fituesi do duhej të vendosej nga 11-metërshat, të kthyer në një dramë më vete.
Nuk kanë mjaftuar pesë goditjet e zakonshme, me çdo skuadër që ka gjuajtur nëntë 11-metërsha. Gjermanët, ndryshe traditës, gabojnë në tre prej tyre. Muller, Ozil dhe Schweinsteiger nuk ia dalin të shënojnë. Zaza, Pelle, Bonucci dhe Darmian qenë të dështuarit te italianët.
Goditja e Darmian-it, e nënta për italianët do të pritej nga Neuer. Për gjermanët e ka radhën Hector të
gjuajë. Topi i tij shkon në rrjetë. Merr fund: 6-5 për gjermanët! Te italianët, Buffon shpërthen në lot.
“Ishte një dramë,” do të pohonte pas ndeshjes Joachim Low, tekniku i gjermanëve. “Ne ishim me fat.”
“Dëshiroj t’i falënderoj djemtë,” qenë fjalët e Antonio Conte-s. “Jam i dëshpëruar, sepse ata meritonin të shkonin më tej.” Për Conte-n kjo qe ndeshja e fundit në drejtimin e Italisë. Tekniku do të vihet në krye të skuadrës angleze të Çelsit, në një eksperiencë të re në Premier League.
Gjermania do ta mësojë emrin e kundërshtarit në gjysmëfinale sonte në mbrëmje, kur Franca të ndeshet me Islandën. /tesheshi.com/
