Komisioni Qendror i Zgjedhjeve në Kosovë ka çertifikuar më në fund zgjedhjet e parakohshme që u mbajtën më 11 qershor, dhe kështu është hapur rruga për krijimin e institucioneve.
Në bazë të Kushtetutës, Kuvendi zgjidhet me mandat katërvjeçar, duke filluar nga dita e seancës konstituive, që mbahet brenda tridhjetë ditësh nga dita e shpalljes zyrtare të rezultateve të zgjedhjeve.
Kuvendi konsiderohet i konstituuar pas mbajtjes së seancës së parë në të cilën bëhet verifikimi i mandateve të deputetëve, zgjedhjes së kryetarit të Kuvendit dhe pesë nënkryetarëve.
Në bazë të rezultatit të zgjedhjeve, vetëm koalicioni i PDK-AAK-NISMA mund të propozojnë kryetarin e Kuvendit. Pas konstituimit të Kuvendit, nisin dhe procedurat e formimit të Qeverisë.
Presidenti Thaçi do të dekretojë mandatarin për formimin e qeverisë nga PAN që është Ramush Haradinaj i cili ka kohë vetëm 15 ditë për të formuar qeverinë. Nëse për herë të parë dështon PAN-i ta formojë qeverinë, atëherë, presidenti e ka ne diskrecion se kujt do t’ia japë mandatin për herë të dytë.
Ndryshe sot KQZ-ja përmes një conference me rastin e certifikimit të zgjedhjeve ka njoftuar se koalicioni PAN ka zyrtarisht 33.74 për qind, apo 39 ulëse, pas saj është Lëvizja Vetëvendosje me 27.49 për qind apo 32 ulëse ndërsa koalicioni tjetër LAA ka 25.53 për qind apo 29 ulëse, kurse Lista Serbe ka nëntë ulëse.
Rezultatet i ka bërë të ditur kryetarja e KQZ-së, Valdete Daka në një konferencë për media.
Ajo kërkoi mirëkuptim për vonesën për përmbylljen e këtij procesi, por tha se procedurat janë çështje ligjore.
Shtyrja e deritanishme e certifikimit të rezultateve ishte bërë për shkak të rinumërimit të votave të subjekteve politike.
