Pak ditë kanë mbetur nga raundi i parë i zgjedhjeve presidenciale në Francë, me rëndësi jo vetëm lokale, por dhe për të ardhmen e BE-së.
Anketimet sugjerojnë rivalitet të fortë mes ekstremistes së djathtë Marine Le Pen, udhëheqëses së Frontit Nacional, dhe centristit Emmanuel Macron.
Parashikohet që Macron të marrë 24 për qind të votave në zgjedhjet e kësaj të diele që vjen, përkundër 23 për qind të votave që mendohet të mbledhë Le Pen. Këta pritet që të shkojnë në balotazhin e 7 majit, ku mundësitë për të fituar janë më të mëdha për Macron-in.
Mes një prej garave më të paparashikuara elektorale në dhjetëra vite, me një të tretën e elektoratit ende të pavendosur, Marine Le Pen ka ashpërsuar gjuhën ndaj emigracionit, duke mëtuar të mbledhë sa më shumë mbështetës.
Në një tubim në një prej rrethinave në veri të Parisit, ajo ka deklaruar se francezët do duhet të zgjedhin midis patriotizmit të saj dhe globalizimit barbar të rivalëve.
Marine Le Pen u zotua ta pezullojë të gjithë emigracionin e ligjshëm në Francë, për t’i dhënë fund kështu, sipas saj, një situate të çmendur, të pakontrolluar.
Ajo paralajmëroi për një moratorium për emigracionin e ligjshëm, si dhe për rregulla më drastike për emigracionin.
Fjalimi i saj i fundit u cilësua si një prej më të ashpërve gjatë tërë fushatës për zgjedhjet presidenciale. /tesheshi.com/
