Këtë mbrëmje, e në atë të së mërkurës, luhen katër takimet e fundit të një të tetave të Champions League-s. Katër sfida që do të plotësojnë tetëshen çerekfinaliste, teksa turneu hyn në fazën më interesante të tij.
Borusia e Dortmundit, Barcelona, Reali i Madridit dhe Bajerni i Mynihut, të kualifikuar tashmë, do të mësojnë se ç’kundërshtarë të tjerë mund të kenë përballë në çerekfinale. Pas asaj fitoreje historike të Barcelonës një javë më parë, të pakta janë pritshmëritë për diçka të ngjashme në këto dy ditë, edhe pse Champions Leagues ofron periodikisht surpriza.
Juventusi pret sonte Porton; një ndeshje e zgjidhur deri diku për torinezët, që kanë fituar 0-2 në Portugali.
Më me pikëpyetje përballja mes Lestër Sitit dhe Seviljes. Rezultati i ndeshjes së parë, 2-1 për spanjollët, e lë gjithçka të hapur, aq më tepër që Lestëri është zgjuar që prej largimit të Ranieri-t.
Të mërkurën, më 15 mars, në orarin e zakonshëm, 20:45, Atletiko e Madridit do të ketë karshi në “Vicente Calderon” Bajer Leverkusenin. Fitorja 2-4 në takimin e parë, forma e dobët e Leverkusenit, të lënë të besosh se për Atletikon nuk do të ketë ndonjë ndërlikim në rrugën drejt çerekfinaleve.
Çka pritet me më shumë interes mes katër ndeshjeve është ajo mes Monakos dhe Mançester Sitit. Tetë gola ka patur 90-minutëshi i parë; “qytetarët” fituan 5-3 në shtëpinë e tyre, por nuk kanë siguruar asgjë. Kjo është dhe sfida që premton më shumë lojë të bukur, gola e befasi; e vetmja ku nuk mund të thuhet nëse njëra apo tjetra skuadër do të jetë fituese. /tesheshi.com/
