Kampionët e Italisë treguan forcën e tyre dhe në Champions League, me një fitore 0-2 në transfertën ndaj Portos.
Juventusi është tani pranë kalimit në çerekfinale me këtë rezultat tepër pozitiv, të arritur nga golat e shënuar prej dy zëvendësuesve, Pjaca-s dhe Dani Alves-it. Braziliani shënoi me t’u futur në lojë, në të parin top të prekur prej tij.
Golat u realizuan në pjesën e dytë për skuadrën italiane, por era e lojës nisi të qe në favor të saj që në minutën e 27-të, kur Porto mbeti me dhjetë lojtarë. Alex Telles mori dy kartona të verdhë brenda dy minutave, duke u prerë krahët portugezëve me marrëzinë e tij.
Më 14 mars, në Torino, do të jetë shumë më e lehtë për Juventusin, e thuajse e pamundur për Porton.
Në takimin tjetër të mbrëmjes, në “Ramon Sanchez Pizjuan”, Vardy u dha fund nëntë ndeshjeve pa shënuar me një gol që e lë të hapur mundësinë e kualifikimit për Lestër Sitin.
Për fituesin e Premier League-s sezonin e shkuar, takimi ndaj Seviljes vendase dukej një vazhdim i lojërave mediokre të muajve të fundit. Spanjollët kryesuan me dy gola në një pjesë të mirë të lojës, e mund të kishin shënuar më shumë nëse Schmeichel nuk do të ishte në ditë të mirë e nuk do të priste dhe një 11-metërsh.
Goli i Vardy-t në minutën e 73-të i dha jetë Lestërit, që shpreson të bëjë sërish çudinë, këtë herë në Champions League. Humbja 2-1 është krejtësisht e përmbysshme, kualifikimi është një mision i mundur. /tesheshi.com/
