Gjykata lituaneze shpalli fajtor për “krime lufte” të fundit ministër të Mbrojtjes së Bashkimit Sovjetik(BRSS), Dimitri Jazov, sot 94 vjeç.
Ai u gjykua për rolin e tij në një sulm të armatosur mbi pavarësinë e Lituanisë 28 vjet më parë, kur nisi dhe shkëputja e republikave balltike nga pushteti i Moskës.
Gjykata e qarkut në Vilnius e dënoi atë me dhjetë vjet burgim.
Ai dhe një tjetër 66 zyrtarë nga epoka sovjetike u përfshinë në akte dhune të armatosur gjatë së cilës vranë 14 persona, dhe qindra të tjerë u plagosën, gjatë një sulmi mbi godinën e televizionit shtetëror më 13 janar 1991. Të pandehurit janë qytetarë të Rusisë, të Bjellorusisë dhe Ukrainës.
Gjyqi filloi në vitin 2016, por vetëm dy të pandehurit kanë marrë pjesë në gjykim, pasi Rusia refuzoi të ekstradojë të vetët.
Rusia gjithashtu hodhi poshtë kërkesën e gjykatës lituaneze për të shqyrtuar dhe ish-udhëheqësin sovjetik Mikhail Gorbaçov.
Vendimi u bë në një kohë kur gjithnjë e më shumë aktivitete ushtarake po zhvilloheshin në Baltik. Disa raporte flasin për shkelje të dyshuar të hapësirës ajrore nga avionët luftarakë rusë dhe rritjen e pranisë së anijeve ushtarake ruse.
Lituania dhe dy shtetet e tjera baltike, Estonia dhe Letonia, kanë frikë se pas përfshirjes ushtarake të Rusisë në Gjeorgji dhe Ukrainë ata mund të jenë në shënjestër të Moskës.
Këto tre shtete u bënë anëtare të NATO-s dhe Bashkimit Evropian në vitin 2004. /tesheshi.com/
