Në kuadër të përgatitjeve në Austri për një ligj të ri për integrimin, ministri i Jashtëm i këtij vendi, Sebastian Kurz, ka propozuar punë të detyrueshme për emigrantët. Pjesë e këtij propozimi është dhe kërcënimi për ndërprerje të mbështetjes financiare për ata që nuk pranojnë të punojnë.
Duke iu referuar këtij propozimi, emigrantët duhet të punojnë nga 15 gjer në 30 orë në javë në punë komunitare, e mund të marrin vetëm 1 euro në orë. Ministri i jashtëm austriak ka kërkuar që nëse dikush nuk pranon ta bëjë këtë punë, atëherë për të duhet të ketë një reduktim të mbështetjes financiare nga qeveria.
Në propozimin ligjor të Kurz-it përfshihen dhe sanksionet për emigrantët që nuk i ndjekin kurset e gjermanishtes.
Në të njëjtën kohë, ai ka propozuar që të ardhurit e rinj emigrantë do duhet të kalojnë pesë vite në Austri përpara se të marrin shumën e plotë të mbështetjes financiare.
Jashtë vëmendjes së Sebastian Kurz-it nuk ka mbetur dhe çështja e burkës, e cila, sipas tij, duhet diskutuar. “Një mbulesë e plotë trupi është pengesë për integrimin,” i ka thënë ai transmetuesit ORF. Burka, ka deklaruar kryediplomati austriak, nuk është një simbol fetar, por një simbol për një kundërshoqëri. /tesheshi.com/
