Diskutimi i hollësishëm i zbatimit të marrëveshjes së armëpushimit në Siri ka mbledhur në Astana të Kazakistanit ekspertë nga Rusia, Turqia, Irani dhe Kombet e Bashkuara.
Njoftimin e ka bërë Ministria e Jashtme e Kazakistanit. Zëdhënësi i kësaj ministrie ka njoftuar po ashtu se për herë të parë pritet që të marrin pjesë në bisedimet dhe përfaqësues të Jordanisë.
Përcaktimi i alternativave për zbatimin e marrëveshjes së armëpushimit, rishikimi i zbatimit të ndërprerjes së luftimeve, si dhe diskutimi i një propozimi nga opozita e armatosur siriane për armëpushimin, janë mes çështjeve që pritet të jenë në tryezën e bisedimeve.
“Kjo ka të bëjë me krijimin e një mekanizmi për të kontrolluar zbatimin e armëpushimit,” ka qartësuar zëdhënësi i diplomacisë kazakistanase.
Marrëveshja e armëpushimit në Siri do të kishte për ndërmjetësues Rusinë e Turqinë, ndërkohë që për një mekanizëm për kontrollin e saj u gjet pajtimi më herët po në Astana, në takimin e janarit. /tesheshi.com/
