Ethet e fushatës në Maqedoni kanë shënuar rastin flagrant të kërcënimit të profesorit universitar, Ali Pajaziti; një ndër zërat më të fuqishëm akademikë në shoqërinë maqedonase. Ka qenë vetë ai që me anë të dy rreshtave status në Fb ka bërë me dije kërcënimin që i është bërë, madje duke publikuar dhe numrin e telefonit të atij që e ka kontaktuar:
“070958126 ky eshte numri i kercenuesit sonte. S’me frikeson fare. Vec nje Zot e kam frike. Voten ua dham per ta ndalu dhunen jo per t’u bere dhunues”, ka shkruar Pajaziti.
Në një prononcim për televizionin Shenja, ai tha se bëhet fjalë për kërcënime nga nëntoka politike.
“Sonte ne ora 8:47 në viber nga një numër i T-Mobile mora mesazhe me ofendime dhe kërcënim për sigurinë time, me fjalë nga më të ultat. Ky njeri me gjasë i shtyrë nga qarqe të nëntokës politike është pasojë e luftës së pistë të kësaj fushate parazgjedhore. Ky është një indikator se në çfarë derexheje kanë rënë servilët e prijësve të politikës sonë”.
Profesori Pajaziti ka informuar mbi disa shprehi që i janë adresuar nga kërcënuesi “gepekun”, “do e marrësh vesh pas disa ditëve”, “ne ia kemi bë kështu e ashtu shkaut…”, e të ngjashme.
Ky përbën një ndër aktet më të rënda të fushatës elektorale në Maqedoni. Pajaziti nuk është rreshtuar politikisht me ndonjë krah, por ka shprehur kritika ndaj pushtetit në përgjithësi dhe partisë shqiptare në pushtet, BDI-së në veçanti. /tesheshi.com/
