Për herë të parë që nga nisja e krizës së refugjatëve, gratë dhe fëmijët përbëjnë shumicën e atyre që ndërmarrin udhëtimin e rrezikshëm drejt Greqisë. Unicef thotë se kjo pjesë e refugjatëve, gra e fëmijë, janë edhe më të ndjeshëm ndaj rreziqeve të udhëtimit drejt Europës.
Kombet e Bashkuara vlerësojnë se fëmijët tashmë kalojnë një të tretën e atyre që kalojnë nga Turqia drejt Greqisë, ndërsa dy foshnje të tjera u mbytën në brigjet europiane. Për herë të parë që nga nisja e krizës, edhe në segmentin kufitar mes Greqisë dhe Maqedonisë, ka më shumë gra e fëmijë sesa të rritur meshkuj, në përpjekje për të kaluar kufirin.
Shifrat janë bërë publike në një kohë që Europa ende nuk ka gjetur zgjidhje për lëvizjen më të madhe të njerëzve që nga Lufta e Dytë Botërore, ndërsa më shumë se 1 milion persona janë zhvendosur nga shtëpitë e tyre për shkak të luftës, dhunës dhe varfërisë duke vendosur në rrezik jetët e tyre në kalvarin e mundimshëm për të zbritur në brigjet europiane.
“Aktualisht, fëmijët llogariten se përbëjnë 36 për qind të atyre që rrezikojnë jetën përmes udhëtimit të tmerrshëm në det në përpjekje për të kaluar nga Turqia në Greqi”, tha zëdhënësja e Unicef, Sarah Crowe.
“Fëmijët dhe gratë në lëvizje e sipër përbëjnë tashmë gati 60 për qind të atyre që hyjnë në Maqedoni”, shtoi ajo.
Shifrat shënojnë një kthesë domethënëse që nga qershori, kur 73 për qind e refugjatëve ishin të rritur meshkuj dhe vetëm një në dhjetë ishte nën 18 vjeç.
Marie Pierre Poirier, koordinatore speciale e Unicef për refugjatët në Europë, thotë se ndikimi i kësaj rritjeje të numrit të grave dhe fëmijëve në fluksin e personave që mbërrijnë në Europë, është shumë i madh. Sipas saj, rreziqet janë më të mëdha në det, sidomos tani në dimër, dhe në tokë duhet që masat e mbrojtjes së tyre të jenë shumë më të forta.
Në të njëjtën linjë me të, edhe IOM theksoi se një në pesë refugjatë që u mbytën muajin e kaluar ndërsa kalonin nga Turqia në Greqi ishte fëmijë, ndërsa vlerësohet se në 272 vdekje, 60 prej tyre ishin minorenë.
Bashkë me shifrat e Janarit, një total prej 330 fëmijësh kanë humbur jetën në këto ujëra përgjatë pesë muajve të fundit, shumë prej të cilëve vetëm pak metra larg nga bregu.
Mbytjet vijojnë në një trend të trishtuar që u përshpejtua vitin e kaluar, kur gati 4 mijë persona humbën jetën në përpjekje për të arritur në Europë.
Kjo katastrofë që ka pllakosur mbi fëmijët, u soll në vëmendje vitin që shkoi kur vogëlushi sirian Alan Kurdi u gjet i pajetë në bregun e detit afër Bodrumit, në Turqi, duke shkaktuar një reagim ndërkombëtar.
Trupat e pajetë të dy foshnjeve të tjera u gjetën nga rojet bregdetare turke në provincën e Izmirit, ditën e martë, së bashku me shtatë viktima të rritur , pak ditë larg nga mbytja e 37 njerëzve në një tjetër pjesë të bregut.
BE i kërkoi Greqisë të mbajë nën kontroll fluksin e azilkërkuesve në brigjet e saj, ku përfshihet regjistrimi më i mirë e kontrollet e sigurisë. Në rast të kundërt, rrezikon t’i rivendosen kontrollet kufitare nga shtetet e tjera anëtare të zonës Shengen.
Greqia u përgjigj me argumentin se do të përdorë ushtrinë për të ndihmuar policinë dhe autoritetet portuale të përballojnë mbërritjet e reja.
Në Janar, pothuajse 62,200 emigrantë e refugjatë hynë në Europë përmes Greqisë, pjesa më e madhe nga Siria, Afganistani dhe Iraku, e sipas IOM, një e treta e tyre ishin minorenë të pashoqëruar.
Policia europiane, Europol njoftoi më herët se minorenët e pashoqëruar që mbërrijnë si refugjatë janë veçanërisht të ndjeshëm ndaj shfrytëzimit, abuzimit dhe trafikimit.
Më shumë se 10 mijë fëmijë të pashoqëruar të regjistruar pas mbërritjes në Europë rezultojnë të zhdukur.
Zëdhënësja e Unicef, duke folur për AFP, pranoi se mekanizmat europianë për mbrojtjen e fëmijëve nuk kanë funksionuar.
Përgatiti: Juli Prifti- /tesheshi.com/
