Sesioni i ri parlamentar po parathotë dhe ndryshimin e aleancave dhe rikonfigurimin e klasës politike sidomos pas miratimit të reformës në drejtësi.
Siç ka deklaruar edhe Edi Rama, një javë më parë PDIU ka marrë një fuqi më të madhe në koalicionin qeverisës, ndërsa LSI duket se po largohet avash avash dhe po bën nxemjen finale.
Ndërsa Ilir Meta deklaroi në Ora Neës në një intervistë për 12 vjetorin e LSI-së se “lidershipi i PS-së synonte eleminimin e LSI-së në ndryshimet kushtetuese të 2008-ës”, në terren i ka hequr deputetët që i kishte dhënë borxh Shpëtim Idrizit për të krijuar grupin zyrtar parlamentar.
Tani pritet që PDIU të marrë një deputet borxh nga PS-ja përveç Anduel Xhindit. Gledion Rehovica dhe Bujar Derveni kanë bërë gati formularët për t’u kthyer zyrtarisht në grupin parlamentar të LSI-së.
PDIU ka të vetët 5 deputetë, konkretisht: Shpëtim Idrizi, Tahir Muhedini, Aqif Rakipi, Omer Mamo dhe Mesila Doda. Ky zhvillim, edhe pse në dukje formal, është i rëndësishëm pasi bën një rillogaritje forcash në Kuvend dhe pozicionimin e gatshëm për çdo eveniment politik.
Vetë Meta, pas përfoljes se disa deputetë të LSI-së mund të kenë flirtuar me Ramën po vendos disiplinë në grup duke rreshtuar forcat.
Testi i parë në Kuvend është ligji për Byronë Kombëtare të Hetimit, për të cilin LSI-ja do të kërkojë ndryshimin e disa amendamenteve. Kjo do të jetë edhe prova për Metën për të parë disiplinën brenda grupit dhe shanset që mund të ketë Edi Rama për të siguruar 71 votat për të qeverisur pa LSI-në.
Konfigurimi i Kuvendit
Mesila Doda pritet të zyrtarizohet si kryetare grupi, pasi aktualisht rezulton Shpëtim Idrizi. PDIU po këmbëngul fort që të jetë grup parlamentar, pasi ka më shumë përfitime. Ajo përfaqësohet në Konferencë Kryetarësh, apo dhe kryetari i saj përfiton shërbime nga shteti si automjete dhe lehtësira të tjera.
Deri më tani ka rezultuar si grup parlamentar edhe Partia Republikane e Fatmir Mediut, por me largimin e Agron Dukës, pritet që këtë sesion të mos ekzistojë më ky grup, vetëm nëse PD i dhuron Mediut 6 deputetë.
Aktualisht rezultojnë pjesë e grupit të PR-së deputetët: Fatmir Mediu; Agron Duka; Bedri Hoxha; Mhill Fufi; Astrit Veliaj; Florion Mima dhe Gjovalin Bzheta. Pra, 5 deputetë janë të PD. Tani Mediut i duhet dhe një tjetër deputet pasi Agron Duka mori partinë Agrare.
Aktualisht, PR ka vetëm një deputet edhe pse në zgjedhje mori 4 të tillë. Fillimisht u larguan deputetët Luan Duzha dhe Ylli Shehu te LSI, dhe më pas Agron Duka.
Me sesionin e ri, lëvizje deputetësh ka edhe sa i takon grupit parlamentar të LSI. Kjo forcë politike ka pasur 20 deputetë, por disa javë më parë përjashtoi deputetin Përparim Spahiu, edhe pse ky i fundit në faqen e Kuvendit vijon që të jetë pjesë e LSI-së.
Sa i takon PS-së, ajo ka 61 deputetë sipas faqes së Kuvendit, ndërsa një numër tjetër i deputetëve të saj kanë dalë të pavarur si Tom Doshi apo Armando Prenga. Po ashtu, nga radhët e tyre rezulton e pavarur dhe deputetja Mirela Ferracaku.
Ndërsa në radhët e PD-së rezultojnë 37 deputetë në grup parlamentar. Por nëse shkrihet grupi i PR, PD pritet të marrë 5 deputetët e saj dhe ta çojë numrin në 41. /tesheshi.com/
