Pak orë pasi zyrtarisht ka marrë zyrtarisht detyrën, në drejtim të kryeministrit Haradinaj ka ardhur edhe kërkesa e parë.
Organizata joqeveritare “Familja dhe Shpresa”, publikisht kërkon nga ekzekutivi i ri dhe opozita që të bashkohen dhe ta plotësojnë ligjin për Gjykatën Speciale dhe në këtë gjykatë të gjykohen edhe kriminelët që prej 18 vitesh gjenden të lirë në Serbi, të mbrojtur nga shteti serb në krye me Aleksandar Vuçiçin.
Kjo shoqatë thotë se drejtësia që kërkojnë është në duart e partive parlamentare shqiptare e askujt tjetër.
“Përçarjet dhe acarimet midis jush, parti shqiptare në pushtet dhe në opozitë, në asnjë mënyrë nuk janë arsye që ju të mos gjeni të paktën një pikë bashkimi të përkohshëm.
Prandaj, ju ftojmë dhe kërkojmë me ngulm nga të gjithë ju që të plotësoni këtë ligj dhe të mundësoni gjykimin e vrasësve të më të dashurve tanë, pikërisht atje në Hagë.
Kërkojmë nga qeveria e Ramush Haradinajt që t’i propozojë parlamentit të Kosovës plotësimin e ligjit për gjykatën speciale.
Në këtë opsion, kërkojmë që VV dhe LDK ta përkrahin atë dhe të votojnë në favor të këtij propozimi. Në rast se qeveria nuk do t´a bëjë këtë propozim në parlament për plotësimin e ligjit në fjalë, kërkojmë që këtë ta bëjë opozita, VV dhe LDK.
Në këtë opsion, kërkojmë që partitë shqiptare pjesëmarrëse në qeverinë e re, ta përkrahin propozimin për plotësimin e ligjit. Për ne, familjarët e viktimave të luftës, nuk është me rëndësi se kush e propozon plotësimin e këtij ligji.
Për ne me rëndësi është plotësimi i tij dhe gjykimi i kriminelëve serbë dhe i Serbisë për krimet e luftës ndaj më të dashurve tanë”, thuhet në komunikatë. /tesheshi.com/
