Sekretari i Përgjithshëm i NATO-s, Jens Stoltenberg, tha për Telegrafin britanik se NATO po punon mbi planet për një prani të përhershme ushtarake në kufijtë e saj lindorë, në kontekstin e përballjes me agresionin e mundshëm rus.
NATO është “në mes të një transformimi themelor” që do të ketë “pasoja afatgjata” për veprimet e presidentit rus Vladimir Putin, tha Stoltenberg.
“Ne jemi dëshmitarë të një realiteti të ri, një “normale të re” për sigurinë evropiane. Prandaj ne u kemi kërkuar komandantëve tanë ushtarakë që të ofrojnë opsione për atë që ne e quajmë rivendosje, një rregullim afatgjatë të NATO-s,” tha Stoltenberg, duke theksuar se trupat ushtarake në vendet anëtare të Evropës Lindore duhet të bëhen një “parandalues i plotë”.
Stoltenberg, i cili mund të vazhdojë mandatin e tij në krye të aleancës me një vit për shkak të situatës në Ukrainë, zbuloi në bisedë se vendimet për gjithçka do të merren në samitin e NATO-s që do të mbahet në Madrid në qershor.
Agresioni rus ndaj Ukrainës ka shkaktuar krizën më të madhe të refugjatëve në Evropë që nga Lufta e Dytë Botërore dhe ka bërë që vendet perëndimore të rishqyrtojnë politikat e tyre të mbrojtjes, sipas Reuters. /tesheshi.com/
