Drejtoria e Përgjithshme e Gjendjes Civile do t´i kërkojë Kuvendit që të shtyjë afatin e amnistisë përsa i takon ndryshimit të adresave për qytetarët.
Afati ka përfunduar më 27 Korrik, ndërsa ndryshimi i adresave u deklarua nga 43 mijë familje. Pas kësaj date, ka nisur aplikimi i gjobave prej 10 mijë lekë.
“Në muajt e parë ka qenë një fluks normal, por u vu re një rritje e konsiderueshme pas procesit të zgjedhjeve”, tha Bledi Doracaj, Drejtori i Përgjithshëm i Gjendjes Civile.
Sipas tij, muaji korrik ka pasur fluksin më të madh të ndryshimeve në adresarët e gjendjes civile kjo pasi qytetarët janë informuar intensivisht.
“Duke vlerësuar numrin madh të kërkesave dhe fluksit, menjëherë me mbledhjen e kuvendit të ri, Drejtoria e Përgjithshme e Gjendjes Civile do të kërkojë një shtyrje afati prej 6 muajsh apo një viti”, u shpreh Doraci, në një intervistë për Report Tv.
Ndalur tek shërbimet që kufizojnë qytetarët të cilët kanë adresa fiktive Doracaj shprehet se pa sistemimin e adresave, nuk përfitohet vërtetimi banorë lagje që të jep mundësi për t´u pajisur me kartën e rezidentit, apo regjistrimin e fëmijëve në çerdhe, kopshte e shkolla. /tesheshi.com/
