Nga Ermir Hoxha
Emërimi i Ben Blushit në krye të Top Channel, nuk ka gjasë të mos shihet dhe si një lëvizje në funksion të linjës editoriale të ekranit të njohur, për të bërë metamorfozën, ndryshimin e kahjeve. Por a ka qenë vërtet TOP-i deri më sot një mbështetës mediatik i Ramës? Le të sjellim një precedent të panjohur për publikun, atë kur ish-presidenti i ndjerë, Dritan Hoxha, bëhej gati të linte Shqipërinë nëse Rama nuk do fitonte zgjedhjet…
Prag-pranvere 2007. Vendi bëhej gati të hynte në zgjedhje lokale. Mazhoranca e kryesuar nga Berisha-kryministër ishte në revan. Dy vjet pas ardhjes në pushtet, ajo kishte “vënë një bast” për t’ja marrë me çdo çmim Edi Ramës, Bashkinë e Tiranës. Ky i fundit, si kreu i ri i PS-së, ishte përfshirë sakaq në një operacion reformimi të forcës politike të lënë nga Nano me dorëheqje. Përballë i kishin vënë Sokol Olldashin. Pushteti po i tregonte dhëmbët më s’pari Ramës, duke ia prishur nënkalimin e Zogut të zi, një vepër publike që mendohej se do kishe impakt elektoral. U prish. Më vonë do ishin fotot gollomesh të kryebashkiakut, dalë në një plazh nudistësh në jug të Francës. Të gjithë shenjat tregonin se Rama nuk do e kishte të lehtë ta rifitonte dhe mandatin e tretë në krye të Tiranës, i cili kësaj here kishte dhe një ngarkesë të madhe politike: ai ishte dhe kreu i ri i opozitës.
E gjitha kjo atmosferë nuk po përjetohej aspak mirë tek njeriu që ishte në shënjestër të pushtetit: Dritan Hoxha dhe TOP-i i tij. Në verë të po atij viti, pushteti do e godiste gjigandin mediatik me një gjobë 12 milion euroshe. Nga ana tjetër, po niste ngushtimi i rrethit në shumë mënyra që TOP-i të lëshonte Piramidën. Kjo e fundit si vendndodhje, i jepte dhe një prestigj të pahonepsshëm për pushtetin.
Mos kishte qenë TOP-i vërtet një media aq partizane sa të ushqente inate tipike mali tek Berisha? Jo! Gatitja e lajmit kishte patur gjithnjë finesën e duhur për t’ju ruajtur militantizmit politik, ndonëse nuk mund të thuhej se linja editoriale e televizionit nuk kishte një anim të lehtë kah Rama, Rama si person me shumë se PS. Ama edhe Berisha e ka patur njeriun e vet në TOP, aq sa për të mos u sulmuar rëndshëm, deri dhe mbrojtur në disa raste: Zamira Kolecin, ish-gazetare e afërt e tij në vitet e presidencës ’92 – ‘97. Megjithatë, Berisha nuk mund t’a harronte deklaratën e Top Channel dy ditë para zgjedhjeve të 2005-ës, ku haptazi doli kundër tij, me thirrje publike për të mos e votuar. U përfol në vonë se ajo deklaratë e ai qëndrim, do kishte për “kokë turku” Andi Bejtjen, i larguar nga drejtimi i lajmeve një vit më pas, për t’u zëvëndësuar nga Sokol Balla.
Kështu pra, një humbje e Edi Ramës në Lokale po përjetohej nga Tani dhe si një fund i TOP-it nga revanshi i Berishës. Dhe si zgjidhje finale kishte nisur të mendonte largimin nga Shqipëria, transferimin në Itali, atdheun e tij të dytë, atje ku dhe u ngjiz si bisnezmen e manjat mediatik, duke marrë me vete dhe televizionin. Këtë jua thoshte nën dëshpërim njerëzve të afërt të tij ato ditë fushatë të egjërt, ndërsa këta të fundit, po ashtu nën dëshpërim, nisën të mendojnë se si do mbesnin pa TOP-in, individualisht ata dhe tregu mediatik shqiptar.
Por ndodhi që Rama fitoi, krejt jashtë çdo parashikimi. Madje aq bindshëm sa Olldashi u detyrua të pranojë humbjen pas u përfunduar ende procesi i votimit. Që prej atij momenti, Tani i TOP-it e nxorri Italinë jashtë axhende.
Dhe sot, kur dhe pak muaj mbushën 10 vite nga vdekja e tij, media që ai themeloi duket se po merr një profil të qartë anti-pushtet, më saktë anti-Rama. Koha, rrethanat dhe interest, do bëjnë të vetën. /tesheshi.com/
