Para datës 2 maj, Erjon Veliaj, kandidati për bashkinë Tiranë, do të duhet të japë dorëheqjen nga kabineti qeveritar dhe Edi Rama detyrohet t’i hyjë një procesi me telashe, pasi përveç pakënaqësisë së brendshme nga kandidaturat në radhët e socialistëve, pritet të zgjohet edhe një reagim si pasojë e emërimit të një ministri të ri.
Burime pranë mazhorancës kanë bërë me dije se gjasat më të mëdha janë drejtimi i Ministrisë së Mireqenies Sociale dhe Rinisë me zv/ministër deri në mbylljen e zgjedhjeve dhe më pas të kryhet një operacion i vërtetë lëvizjesh dhe rrokadash brenda qeverisë “Rama”.
Megjithatë nuk përjashtohet edhe një lëvizje flash këto ditë, por ky operacion do të rezoltonte kostoz, si pasojë e fushatës dhe procedurave qeveri-presidencë-parlament, që mund të sillnin probleme politike.
Siç mësohet, nëse do të ketë një rezultat pozitiv për mazhorancën në zgjedhjet e 21 qershorit, pritet që skema e kabinetit të Edi Ramës, të pësojë një ndryshim cilësor, por që si bazë të saj ka një aksion dhe një emër. Aksioni quhet “Lazarati në drejtësi” dhe emri është Sajmir Tahiri. Ministri i Brendshëm aktual mund të transferohet në dikasterin që drejtohet nga një përfaqësues i LSI-së, Nasip Naço, për të konkretizuar “tërmetin në kupolën e drejtësisë”, që në fakt i është vënë kusht real nga Konferenca e Berlinit Edi Ramës, gushtin e shkuar.
Me largimin e LSI-së nga Drejtësia, kjo parti merr ministrin e Mbrojtjes, ku sipas gjasave do të ofrohet Sekretari i Përgjithshëm i Lëvizjes Socialiste për Integrim, Luan Rama. Post që e ka pasur edhe në qeverinë “Meta”, në vitin 2001.
Ndërkaq, ministrja aktuale Mimi Kodhëli, pritet të marrë dikasterin e lënë bosh nga Erjon Veliaj ose Ministrine e Brendshme nga ku lëviz Saimir Tahiri. Nëse ndodh ky opsion, atëherë do të kishim një rrokadë mes Lindita Nikollës dhe Eglantina Gjermenit, të cilat do të këmbenin postet. Ndërkaq një opsion tjetër është Kodheli tek Ministria e Zhvillimit Urban dhe Gjermeni tek Arsimi, ndërsa Blendi Klosi emërohet ministër i Kulturës. Tek ministria e Brendshme ka kohë që ka “vendosur radhën” nënkryetari i grupit parlamentar të PS-së, Taulant Balla.
Por për dikasterin e Tahirit, pretendent është edhe Blend Klosi, i cili u mor nga Rama në vizitën e fundit në Emiratet e Bashkuara Arabe, tur ky që u komentua shumë si një lëvizje çoroditëse e Kryeministrit për të turbulluar ujrat gjithsesi jo të qeta në PS, për t’i kthjelluar sërish.
Por të gjitha këto do të varen nga rezultati në zgjedhjet e 21 qershorit. Edhe nëse ndodh kjo, atëherë, gruan që Rama nuk e kandidoi në Tiranë, mund ta bëjë gati për të pasuar Bujar Nishanin në Presidencë, dy vjet më pas. Mos vallë duhet dikush që të ketë përvojë në ushtri? Ngaqë do të jetë Komandante e Përgjithshme e Forcave të Armatosura…Ndoshta!
/tesheshi.com/
