Ndryshimet klimaterike rrezikojnë të krijojnë në botë destabilitet për shkak të shtimit të varfërisë dhe mungesë së ushqimit. Në momentin kur drithërat nuk prodhojnë dhe çmimet rriten me shpejtësi, atëherë mund të priten trazira, thonë ekspertët që janë të bindur se moti ekstrem mund të ndikojë në prodhimin e ushqimeve bazë shtatë vjet brenda një dekade e kjo deri në fund të shekullit.
Autorët e studimeve për ndryshimet klimaterike thonë se edhe besimi i madh që i jepet tregtisë botërore mund të bëjë që këto kontraste në prodhim të jenë edhe më të mëdha. Ndikimi i ndryshimeve klimaterike në ushqim mund të ndjehet në të gjithë Afrikën dhe në Lindjen e Mesme kryesisht, por edhe në të gjithë globin.
Të korrat e pakta dhe rezervat e ulëta të grurit në vitin 2008 kombinuar me faktorë të tjerë prodhuan një rritje spektakolare të çmimeve, me indeksin 2.8 herë më të lartë sesa në fillim të mijëvjeçarit.
“Nëse përballemi me rritje të kërkesës por papritur kemi një vit katastrofik, të gjithë do ta ndjejmë”, thotë profesor Tim Benton.
Në vitet 2010-2011, një valë të nxehti që përfshiu Rusinë bëri që vendi të përjetonte thatësirën më të vështirë në 40 vjet, duke ulur shumë prodhimin e grurit e duke shkaktuar trazira e revolta në vendet afrikanoveriore pasi çmimi i bukës u rrit me shpejtësi.
Pikërisht këtë lloj lidhje po studiojnë tashmë kërkuesit në Britani dhe Shtetet e Bashkuara, sa shanse ka që moti ekstrem mund të shkaktojë trazira “ushqimore” ndërsa bota ngrohet përgjatë gjithë shekullit ku jetojmë.
Duke parë prodhimin e orizit, misrit, grurit dhe sojës, shkencëtarët kanë gjetur se shanset e një katastrofe një në 100 vjet si çka qenë, të rriten me një në 30 vjet deri në vitin 2040.
Nga 2010 e më pas, ata vlerësojnë se vitet katastrofike për prodhimin e drithërave bazë mund të shtohen e të bëjnë që prodhimi global të bjerë me 10 për qind, kjo mund të ndodhë në shtatë vjet nga dhjetë të tillë në një dekadë.
“Ngjarjet më ekstreme të motit në të ardhmen ka gjasa të shndërrohen në më të shpeshta, më të fuqishme dhe potencialisht të shkaktojnë trazira më të mëdha”.
Organizata e OKB-së për ushqimin thotë se me rritjen e popullsisë do të ketë një rritje të kërkesës për ushqim deri në 60 për qind kështu që do të ketë presion të madh për prodhimin e drithërave.
Prodhimi i ulët kombinuar me barrierat tregtare mund të sjellin rritje të papritura e të shpejta të çmimeve. Vendet më vulnerabël janë ato që bazohen kryesisht në ushqimet elementare.
Mund të imagjinohet situata në vendet e varfra ku familjet shpenzojnë më shumë se 50 për qind të të ardhurave për ushqim dhe çmimet rriten me 50 për qind. Kjo i vendos ato në një situatë të papërballueshme.
Shkencëtarët apelojnë liderët botërorë të shohin me përparësi edhe problemin e ushqimit në botë, më shumë sesa strategjitë ushtarake, pasi si ç thonë, edhe problemi aktual me ekstremistët e Shtetit Islamik u nxit nga një shkëndijë e protestave për bukë. /tesheshi.com/
