Liderët e 19 vendeve në samitin e G20 në Gjermani janë rizotuar të zbatojnë marrëveshjen e Parisit për ndryshimet e klimës, pavarësisht tërheqjes së Shteteve të Bashkuara të Amerikës. Ngërçi në lidhje me këtë çështje ka mbajtur pezull ditën e fundit të bisedimeve në Hamburg por, gjithsesi, në fund është arritur në një marrëveshje finale.
Kjo deklaratë finale njeh tërheqjen e presidentit Donald Trump nga marrëveshja e Parisit për ndryshimet klimaterike por që nuk ka ndikuar në angazhimin e vendeve të tjera.
Kompromisi erdhi pas protestave të dhunshme në qytetin që priti samitin. Deklarata e përbashkët e publikuar të shtunën thotë: “Ne jemi vënë në dijeni të vendimit të Shteteve të Bashkuara të Amerikës për t’u tërhequr nga Marrëveshja e Parisit”.
Sidoqoftë, liderët e G20 bien dakord se marrëveshja është e “pakthyeshme”.
Deklarata thotë gjithashtu se SHBA do të “përpiqet të punojë ngushtësisht me vendet e tjera për t’i ndihmuar ato të kenë akses në karburantet fosile më pastër dhe në mënyrë më efikase”.
Trump ka premtuar të ndihmojë industrinë amerikane të qymyrit për t’u ringritur dhe më parë, e kishte cilësuar marrëveshjen e Parisit si një pakt që synon dëmtimin e punonjësve të vendit të tij. /tesheshi.com/
