Mbledhja e sotme e qeverisë e mbajtur paradite ka sjellë disa ndryshime në përbërjen e saj në nivel zv/ministrash, si dhe ka emëruar 7 prefektë të rinj në qarqet kryesore.
Këto ndryshime janë bërë kryesisht për shkak të zv/ministrat dhe prefektët që zëvendësohen janë pjesë e listës së kandidatëve për deputetë në zgjedhjet e reja. Ata do t’i përkushtohen kështu me kohë të plotë fushatës pa pasur konflikt me detyrat në administratë.
Zv/ministra të rinj në ministritë e PD-së:
Këshilli i Ministrave vendosi të emërojë zv/ministra të rinj në të gjitha ministritë që do të marrë në drejtim opozita me votimin e emrave pasdite në Kuvend. Kështu, në Ministrinë e Financave largohet Ervin Mete dhe rikthehet Irena Beqiraj, e cila aktualisht mban postin e Këshilltares ekonomike të kryeministrit Rama.
Në Ministrinë e Brendshme largohet Elona Gjebrea, e cila kryeson listën e kandidatëve të PS-së në Tiranë dhe në vend të saj emërohet Rovena Voda, njeriu i besuar i Fatmir Xhafajt. Në ministrinë e Arsimit Gerti Janaqi zëvendëson Redi Shtinon, Etilda Gjonaj zë vendin e Eridjan Salianjit tek Drejtësia dhe Mira Kapisyzi merr postin e zv/ministres së Shëndetësisë.
Në Prefekturën e Tiranës është emëruar, Admir Abrija, deri tani administrator i një prej njësive të Bashkisë Tiranë. Ai zëvendëson Sadi Vorpsin, i cili është i 17-ti i PS-së në Tiranë.
Prefektët e rinj:
Admir Abrija Prefekt i Tiranës
Pandi Papando Prefekt i Korcës
Vasil Bregu Prefekt i Fierit
Ardit Demiri Prefekt i Elbasanit
Emiljan Jani Prefekt i Durrësit
Ardit Kaja Prefekt i Dibrës
Valbona Zylyftari Prefekt i Beratit
/tesheshi.com/
