“Duhet të rimendojmë marrëdhënien me NATO-n”. Kandidati republika, Donald Trump, gjatë një interviste për rrjetin televiziv amerikan CNN, shpjegoi politikën e jashtme që do të ndjekë në krye të Shtëpisë së Bardhë, duke dhënë një tjetër deklaratë kontroverse. “Amerika duhet të qëndrojë në NATO, por duhet të shpenzojmë shumë më pak”, tha ai.
Ndërkaq, duke u kthyer tek politika si anëtare e NATO-s, Trump pretendon se Shtetet e Bashkuara duhet të rimendojnë marrëdhënien me të, pasi aleanca e mbrojtjes kushton shumë para. Ai tha se SHBA paguajnë një pjesë disproporcionale për NATO-s për sigurinë e aleatëve.
“Sinqerisht, ata duhet të hedhin më shumë para”, tha ai. “Ne po paguajmë në mënyrë jo proporcionale. Është shumë, dhe sinqerisht është një botë shumë e ndryshme nga ajo që ishte kur u ngjiz ideja e NATO-s”.
Për shembull, Trump tha se Uashingtoni po “përkujdesej” për Ukrainën dhe kombet e tjera europiane nuk po bëjnë mjaftueshëm për të mbështetur qeverinë e Kievit që është e mbërthyer në një betejë të gjatë me Moskën.
Por, si shpeshherë në deklaratat e tij, më pas gjatë intervistës Trump saktëson idetë e tij duke thënë se “SHBA nuk duhet të ulin rolin e tyre në NATO, por duhet të ulin shpenzimet”. Megjithatë, këto komente të kandidatit të avantazhuar republikan për Shtëpinë e Bardhë mund të nxisin ankth në rrethet perëndimore që mbikqyrin politikën e jashtme.
Por sa i takon politikës së jashtme, ka qenë një sfidë në distancë ajo me Hillary Clinton përpara komunitetit hebraik. Clinton u shfaq “presidenciale” në ndërhyrjen që bëri në konferencën e përvitshme në Uashington të lobit të fuqishëm hebraik Aipac. Ajo ndërmorri një sulm frontal ndaj kandidatit Trump, edhe pse nuk e përmendi me emër, duke pohuar se: “Amerika nuk mund të jetë neutrale kur bëhet fjalë për sigurinë e Izraelit apo mbijetesën e tij”, e duke rikonfirmuar se “siguria e Izraelit nuk është e negociueshme”. Këto deklarata vijnë në kundërshtim me atë që kishte deklaruar më parë manjati i Nju Jorkut që kishte këmbëngulur se ishte i bindur se nga një pozicion neutral ndaj konfliktit palestinezo-izraelit, mund të jetë mundësi për të “negociuar” më mirë.
Por, në intervistën e tij me CNN, Trump tha se Clinton nuk ka fuqinë për të qenë president dhe hodhi poshtë akuzën e saj se ai ishte shumë i paqëndrueshëm për të qenë kryekomandant.
Komentet e kandidatit republikan u shtrinë edhe në akuza të tjera që i adresohen, si p.sh se ai nuk ka kualifikimin e domosdoshëm për të qenë president. “Kam duart të më të fuqishme. Shikojini këto duar”, tha Trump, duke akuzuar Clinton se thjesht lexon fjalimet e shkruara për të nga të tjerët.
Trump tha gjithashtu se nëse zgjidhet president, ai do të kërkon zhvendosjen e ambasadës amerikane në Izrael nga tel Avivi në Jeruzalem, shenjë e një lëvizjeje në politikën afatgjatë amerikane.
“Është një proces, por mjaft i shpejtë”, tha Trump, i pyetur sesa shpejt mund ta bëjë një lëvizje të tillë.
Ai doli kundër shumë përafqësuesve republikanë duke thënë se do të vijonte politikën e presidentit Obama për normalizimin e marrëdhënieve me shtetin e Kubës, ish-kundërshtar politik.
“Por, dua marrëveshje shumë më të mira sesa ato që po bëjmë”, tha Trump, duke thënë se “në kohën e duhur” do të donte të hapte një linjë hotelesh lukzosë në Havana, që mbajnë firmën e tij. Ai tha se Castro e ka begenisur fare pak Obamën duke mos e pritur në aeroport.
Përgatiti: Juli Prifti – /tesheshi.com/
