Forcat ukrainase kanë shtyrë trupat ruse nga Kupyansk-u në rajonin e Kharkiv dhe po mbajnë kontrollin mbi situatën në periferi të qytetit, tha Nazar Voloshin, zëdhënës i grupit ushtarak Khortytsia.
Trupat ruse shtuan përpjekjet pranë Kupyansk-ut në fillim të shtatorit dhe u afruan më pranë periferisë industriale të qytetit në verilindje. Në fillim të nëntorit, forcat ukrainase zmbrapsën me sukses përpjekjet ruse për të hyrë në qytet.
Faqja e monitorimit DeepState, e cila mbështetet në informacione nga qytetarët, raportoi gjithashtu më 26 nëntor se forcat ukrainase kishin përfunduar pastrimin e Kupyansk-ut nga ushtarët rusë.
Duke folur në televizionin kombëtar, Voloshin tha se Rusia po përdorte grupe të vogla në përpjekje për të kaluar bregun e djathtë të lumit Oskil.
“Edhe nëse grupet prej tetë deri në dhjetë persona arrijnë të kalojnë, vetëm dy ose tre nga secili grup arrijnë në bregun (djathtas). Armiku është eliminuar edhe atje. Gjithçka atje (në Kupyansk) është nën kontrollin e forcave tona…”.
Kupyansk është një qendër kryesore logjistike dhe hekurudhore në pjesën lindore të rajonit të Kharkiv-it. Me disa autostrada dhe pesë linja hekurudhore që kalonin nëpër të, qyteti u pushtua për pak kohë nga trupat ruse përpara se të çlirohej gjatë një kundërofensive të suksesshme ukrainase në vjeshtën e vitit 2022.
Marrja e qytetit do të nënkuptonte zgjerimin e rrugëve veriore dhe jugore të furnizimit nga rajoni i Belgorodit të Rusisë, duke mbështetur përpjekjen e tyre për të kapur të gjithë rajonin e Donbasit. /tesheshi.com/
