Troket një ndryshim “revolucionar” në funksionimin e Vatikanit.
Papa Françesku ka vendosur t’u japë grave të drejtën e votës në një takim të ardhshëm të peshkopëve, një ndryshim i paprecedentë që pasqyron shpresën e tij se gratë do të kenë më shumë ndikim në vendimmarrje dhe se laikët do të kenë një rol më të madh në jetën e katolikëve, raporton AP.
Papa Françesku ka miratuar ndryshimet në normat që drejtojnë Sinodin e Ipeshkvijve, organi i Vatikanit që mbledh peshkopët e botës për takime periodike, pas një dekade kërkesash të grave për të drejtën e votës.
Vatikani njoftoi të mërkurën ndryshimet e miratuara nga Papa, të cilat nënvizojnë vizionin e tij që besimtarët laikë të marrin një rol më të madh në çështjet e kishës që deri më tani u janë besuar vetëm klerit, peshkopëve dhe kardinalëve.
Që nga Koncili i Dytë i Vatikanit, një seri takimesh në vitet 1960 që modernizuan kishën, papët kanë mbledhur peshkopët e botës në Romë për disa javë për të diskutuar tema specifike.
Në fund të mbledhjeve, peshkopët votojnë për propozime specifike dhe ia paraqesin Papës, i cili më pas harton një dokument duke marrë parasysh pikëpamjet e tyre.
Deri më tani, të vetmit që mund të votonin ishin burrat.
Megjithatë, sipas ndryshimeve të reja, por këtej e tutje pesë motra fetare do t’i bashkohen pesë priftërinjve si përfaqësues të urdhrave të tyre kishtarë me të drejtë vote. /tesheshi.com/
