U bë e dyta herë rradhazi që një figurë si Robert Ndrenika ndërmerr aksione të vogla politike, që tregojnë se aktorit të madh shqiptar nuk po i pëlqen mënyra e qeverisjes nga Edi Rama.
Në fakt, Ndrenika, edhe pse një figurë diskrete e protagonizmit publik, dikur u përfshi në politikë, në vitin 1996, kur u zgjodh deputet i PD-së. Por që atëherë i ka qëndruar larg politikës, për t’u përmendur së fundi vetëm në rastin e përballjes me ministren e Kulturës, Kumbaron, kur deklaroi se do varrosej përsëgjalli në rast të prishjes së Teatrit Kombëtar, pikërisht aty. Ndërsa këtë të shtunë, doli për të protestuar edhe ai kundër ligjit të importit të mbetjeve, ose ndryshe kundër Ramës.
Nisur nga origjina, Vunoi, atje nga është nip dhe Edi, Berti do ishte krah tij, por ja që vitet e kanë treguar se as këto lloj kontekstesh, siç është dhe ai i të qenit artist, nuk kanë mundur dot t’i lërë në një llogore qëndrimesh e shijesh politike. Sepse, edhe pse vjen nga bota e artit, Edi Rama jo rrallë i ka patur kundër ata në politikëbërjen e vet, artistët, sidomos aktorët, të cilët duket sikur janë hakmarrë ndaj urrejtjes së shfaqur nga Rama për kinemane shqiptare të socrealizmit, me pamfletet e tij të hidhura letrare në mes të viteve `90.
I pari aktor afër Ramës në raporte politike ka qenë Arben Imami, që siç dihet sot urrehen ndërsjelltazi me të njëjtin intensitet. Ndërkohë që, urrejtja më e madhe e “skenës” dhe e “filmit” ndaj tij ndaj tij do shfaqej në rastin e përplasjeve për Teatrin Kombëtar kur ishte Ministër Kulture.
Një batutë e tij me “brekët e Violeta Manushit”, do e bënte armik të shumicës së aktorëve të cilët kundërshtonin prishjen e teatrit. Më pas, Ramës iu vu keqazi me shkrime Hervin Çuli, që sot, për ironi të fatit, e gëzon postin e ëndërruar të drejtorit të TK-së pikërisht falë Ramës, pasi nuk e morri dot me Berishën, edhe pse u përfshi në KOP.
Në 2003, kundër tij do pozicionohej dhe një mik: Bujar Lako, i cili do kandidonte për kryetar njësie bashkiake me siglën e PD-së. Por më luftëtarja kundër tij ka qenë Rajmonda Bulku, edhe nga fakti se u zgjodh deputete e PD-së. E së fundi, kundër Ramës është shfaqur dhe aktorja shkodrane Rita Gjeka, e cila e ka vlerësuar si një ish-shok të vjetër shkolle, por jo si kryeqeveritar.
Ndërsa ndër të rinjtë e skenës, kundër tij është Julian Deda, i biri i Zefit.
Por ka patur dhe miq Rama ndër aktorë, siç Petrit Malaj i cili u zgjodh kandidat në zgjedhjet e 2009-ës, pa mundur të fitojë, si dhe fatkeqja Luiza Xhuvani.
Megjithatë, dalja e Robert Ndrenikës në protestën e së shtunës kundër importit të mbetjeve, tregon se Rama nuk ka mundur dot t’i fitojë zemrat e bashkëfamiljarëve të tij të artit.
Kot nuk ka thënë Safa Ymeri: “Ah kjo politika bën lëmsh dynjanë”
Përjashtim në këtë mes, por që ka gjithsesi një domethënie për raportet mes Ramës piktor dhe aktorëve, përbën fakti që edhe bashkëshortja e parë e tij ishte një aktore, Matilda Makoçi. Por nuk dihet nëse e urren edhe ajo, sigurisht jo për ligjin e mbetjeve apo stilin e qeverisjes. /tesheshi.com/
