Deri në 478 kilogramë kokainë, me vlerë rreth 70 milion euro, me shumë gjasë “pronë” e Ndrangheta-s, u kapën në portin e Rijekës Kroaci, në janar 2017, në fshehtësi të plotë.
Publiku nuk e mori vesh kurrë për sekuestrimin, i cili nuk ishte përfshirë në të dhënat publike për sasitë totale të drogës së sekuestruar. Të gjitha me qëllim për të mbrojtur konspiracionin e aksionit që policia italiane në bashkëpunim me atë kroate dhe sllovene kryen për më shumë se katër vjet.
Operacioni, i koduar “Makina” tani ka përfunduar në Itali me arrestimin e gjithsej 12 personave, disa prej të cilëve janë udhëheqës të rrjetit nga rajoni i Kalabrisë, të cilët bashkëpunuan me një grup kriminal lokal të njohur për trafikimin e kokainës.
Informacioni erdhi nga një shtet anëtar i Europol-it në 2016 se një kontenieri me një sasi të madhe kokainë duhet të mbërrinte në terminalin e Rijekës me një anije ngarkese.
U bë një plan për të ashtuquajturën “shpërndarja e kontrolluar”, d.m.th. gjurmimi i dërgesës te klienti përfundimtar. Dhe konkretisht, në janar 2017, oficerët e policisë kroate gjetën një kontenier me drogë, e hapën atë dhe nxorrën prej aty 478 nga gjithsej 480 kilogramë kokainë të gjetur të ngjeshur në një makineri të madhe plastifikuese.
Makineria më pas u saldua dhe u lye përsëri, këtë herë me vetëm dy kilogramë kokainë, dhe kontenieri, në mënyrë që askush të mos dyshonte se dikush e kishte hapur atë, ishte mbyllur siç duhet dhe policia vazhdoi të ndiqte rrugën e tij deri tek konsumatori përfundimtar. Kontenieri me makinerinë u ngarkua më pas në një kamion nga porti i Rijekës dhe vazhdoi udhëtimin për në Itali përmes Sllovenisë. /tesheshi.com/
