Liqeni i Dibrës së Madhe është ndër bukuritë e këtij qyteti; por ashtu si një i ngjashëm me të në Shqipëri, ai i Kukësit – që të dyja kanë si shkak krijimi hidrocentrale përkatëse – janë katandisur në vatra ujore bërlloku që të ngjallin trishtim. Kur sheh atë të Dibrës, të duken si pakuptim protestat e dikurshme në mbrojtje të Radikës. Ja ku është liqeni si provë e faktit se sa pak kujdes ka për të, ndërkohë që duhej të ishte shumë i shtrenjtë për banorët rreth e qark. është një pasuri që duhet ruajtur pasi nga ajo ka dhe shumë përfitime.
Epidemiologët thonë se niveli i ndotjes është në shkallën e dytë dhe, sipas tyre, nëse nuk merren masa, liqeni jo vetëm nuk mund të shfrytëzohet më për asgjë të bukur e të këndshme, por do të shndërrohet në vatër infeksioni.
Deri më tani për liqenin, pastrimin e tij, kujdesen vetëm shoqatat ambientaliste. Por do të duhej që situatën ta merrte në dorë Ministria e Ekologjisë.
Aty, në funksion të plazhit është menduar deri dhe për ngritjet e dy pikave të vrojtimit, por ashtu siç është katandisur nga hedhja e mbeturinave, asgjë nuk ka vlerë. Në kushtet e Maqedonisë, situata bëhet akoma dhe më dëshpëruese, pasi edhe në rafshin nacional përbën një turp. Shqiptarët nuk duhet t’ja lejojnë vetes që pasuritë e tyre t’i trajtojnë në këtë formë. /tesheshi.com/
