Nga Mensur Krasniqi
Se maqedonasit kanë jetuar me paragjykime ndaj shqiptarëve është diçka e njohur, mirëpo që edhe fëmijët e tyre kanë trashëguar të njëjtin leksion, e ka ndarë me opinionin së fundi një gjysh maqedonas, Nikolla Pisarev.
Rrëfen ai:
“Para disa ditëve nipi im i vogël (klasa e tretë) vjen nga shkolla dhe më kumton një lajm të rëndësishëm: “I urrej shqiptarët!”. Mezi u mbajta në karrige dhe gati sa u alivanosa, sepse ky konstatim nuk vjen nga shtëpia jonë.
Shkolla e tij është në komunën më VMRO-iste të qytetit, e mbushur me ikonografi adekuate. Mbahem në karrige dhe më bie ndërmend se të premte është dita e Xhumasë, ditë kur zakonisht dal edhe në Çarshi.
Pa sulme dhe histeri e binda nipin tim të shkojmë deri në Çarshi për t`i vizituar zanatlinjtë: Vlatkon, Xhelën, Asllanin, pastaj të blejmë fara për majdanoz te xhaxhi Shaban, te çajtorja ta takojmë hoxhë Ramadanin dhe të bëjmë muhabet. Dhe në fund te Destani për qebapë.
Po shkonim me nipin në vizitat e planifikuara. Mirëdita! Si je? Si shkon puna?…të gjitha po i them në gjuhën shqipe. E pyes nipin më pas për secilin nga personazhet që takuam dhe biseduam se a i urren këta zotërinj, pra njerëzit që takuam?
Nipi i habitur më shikon dhe thotë: Jo gjysh! Përse t`i urrej?!
Po më parë kur erdhe nga shkolla më the se i urren shqiptarët. Ja, shqiptarët janë këta miqtë e mi, e ti i urren tash. Fëmija u skuq dhe në mënyrë naive m’u përgjigj: Gjysh, por kështu thonë të gjithë në shkollë!
Të pshurrsha në shkollë i thashë. Ju them të gjithë maqedonasve t’i dërgojnë më shpesh fëmijët në Çarshi, ta mësojnë shkollën e jetës, përndryshe gjithë jetën do mbesin VMRO-istë, humbje e madhe.”
/tesheshi.com/
