Për herë të parë, PD i është referuar së kaluarës së saj në qeverisje për të treguar një avantazh ndaj qeverisjes së sotme, gjë që mungon në të gjithë ligjërimin e saj, pothuajse për çdo çështje, kur është fjala të akuzon pushtetin aktual të PS.
E ka bërë këtë në rastin e akuzës për mosftesën e Ramës ndaj saj në rastin e negociatave.
Në një deklaratë për mediet, Sekretarja për Organizatat Partnere(PD-ja e Berishës), Megi Balliu u shpreh se “që nga Konferenca e Londrës në vitin 1913, dhe Konferenca e Paqes së Parisit më 1919, shqiptarët kanë shkuar së bashku aty ku është folur dhe vendosur për fatin e përbashkët”, por që sipas saj, ky rregull historik u prish nga Rama.
Sipas asaj çfarë tha ajo, Berisha nuk e prishi këtë rregull kur qeveriste. “Në delegacionet e kryeministrit Berisha ka patur përfaqësues të opozitës në të dy rastet. Edi Rama duke anashkaluar opozitën, duke shpërfillur unitetin dhe përfaqësimin në një moment me valencë kombëtare, e ktheu Shqipërinë në kohën e komunizmit. Sigurisht, ne krenohemi që jemi pjesë e një modeli që ka parë dhe sheh nga uniteti kombëtar dhe përfaqësimi”, u shpreh ajo.
Nga ana tjetër, Rama tha se do donte ta kishte opozitën(PD), porse ajo, si e ndarë më dysh, e bën të vështirë e gati të pamundur të kuptohet se cila është prej dy kahjeve. Pra, kë duhet të ftonte Rama, kahjen e udhëhequr nga Alibeaj apo atë nga Berisha? /tesheshi.com/
