Nga Bashkim Kastrati
Koalicioni parazgjedhor PDK-AAK-Nisma (PAN) në letër duket gjigant, por në terren në disa qytete nuk po arrin që të mbledhë shumë simpatizantë, kjo shpesh edhe për faktin se këto parti kohë pas kohe bëjnë fushatë në mënyrë të ndarë.
Tubimet e PDK-së në Mitrovicë dhe Skenderaj nuk ishin aq masive sa pritej, duke marrë parasysh se këto komuna konsiderohen bastione të PDK-së. Edhe Vushtrria konsiderohej e tillë, por dje në palestrën e sportit “Tota” kjo parti nuk kishe prezencë aq masive. Aty ishin të pranishëm rreth 1500 qytetarë, ndërkaq para tri ditëve Lëvizja Vetëvendosje që nuk ka pasur ndonjë fuqi më të madhe në këtë komunë, mblodhi rreth 1600 qytetarë.
Siç shihet gara është e ngushtë edhe në këtë komunë. Si qëllim për të mbledhur sa më shumë pjesëmarrës, një kompani e ndërtimit që vepron në këtë komunë, e që njihet e afërt me PDK-në kishte sjellë rreth 100 punëtorë të ndërtimtarisë në këtë aktivitet elektoral. Ata për disa orë e lanë punën në ndërtim, për të brohoritur për PDK-në. Lanë kacitë për të kapur flamujt e partisë.
Ata ishin me uniforma të punës dhe shiheshin se ishin të organizuar që në fillim. Kur të pranishmit po zinin vend, ata iu kërkonin të tjerëve që të mos uleshin afër tyre, pasi që prisnin edhe disa nga kolegët e tjerë dhe të bëheshin grup.
Ekipi i tesheshi.com provoi të bisedonte me disa prej tyre, por ata nuk pranuan. Disa prej tyre nuk vëreheshin të interesuar shumë për fushatën, por dukej se e kishin obligim nga shefi i tyre. Nga tërë të pranishmit, ky grup i punëtorëve me uniforma ishin më të zëshëm sesa pjesa tjetër.
Ndërkohë herë pas here afër tyre afrohej një person me kostume dhe kravatë që në fakt dukej si një lloj “dirigjenti” i cili iu jepte këshilla punëtorëve se si të vepronin, siç duket ishte shefi i kompanisë. Në përfundim të tubimit, derisa të gjithë pjesëmarrësit kishin dalë jashtë, këta punëtorë u mblodhën tek dera e ku pritej që të dilte Kadri Veseli dhe siç dukej qëllimi ishte që Veseli t’i shihte këta punëtorë në mënyrë të organizuar që po e përkrahin, e në anën tjetër shefi i kësaj kompanie siç duket e kishte qëllimin të tregonte besnikëri ndaj PDK-së.
Ndryshe në Kosovë që nga paslufta ka një dukuri që njihet si klientelizëm, ku partitë që janë të afërta me partitë në pushtet dhe i financojnë në fushata elektorale, marrin tenderë nga institucionet publike me vlerë miliona euro, një lidhje e tillë lehtëson edhe marrjen e lejeve të ndërtimit dhe privilegje tjera. /tesheshi.com/
