Nga Bashkim Kastrati
Në lagjen “Kodra e Trimave” jetojnë tri familje të braktisura nga institucionet e Kosovës. Këto tri familje jetojnë në kontejnerë dhe baraka në kushte shumë të vështira, ndërsa më së afërti e kanë Ambulancën e lagjes, ku shpesh thonë se shkojnë për t’u kontrolluar për shkak të infeksioneve dhe sëmundjeve tjera që shkaktohen nga kushtet e këqija në vendin ku banojnë.
Në kontejnerët dhe barakat ku jetojnë këto familje është vështirë që të jetohet edhe verës edhe dimrit. Të hysh në kontejnerin e njërës familje në këto ditë të nxehta është shumë e vështirë, sepse nuk mund të qëndrosh shumë minuta nga prania a madhe e mizave, banorët thonë përkundër që e spërkatin vendin është e kot, sepse ambienti aty i tërheq shumë.
Ajo dhomë e improvizuar në kontejnerë shërben edhe si kuzhinë edhe si vend për të ndenjur e fjetur.
Njëra nga banueset që jeton në kontejner, Zelfije Alidemaj, ka treguar për tesheshi.com për jetën e vështirë që e bënë në këtë kontejner. Ajo thotë se jeton aty që pesë vite dhe se zyrtarë të institucioneve rrallë shkojnë për t’i vizituar, ndërsa thotë se kanë marrë edhe premtime të shumta se Komuna e Prishtinës do t’ua mundësojë që të jetojnë në banesa që do të nderohen.
“Fillimisht kemi qendru të barakat afër “Rilindjes” (ku është sot objekti i ri i qeverisë v.j) dhe prej aty na kanë pru këtu ne këtë kontejner. Jeta këtu është shumë e vështirë. Përveç të gjithave të këqijave që i kemi këtu, edhe djalin e kam të sëmurë mental që disa vite dhe kjo e bën jetën edhe shumë më të vështirë”, thotë Zelfija, e cila në ato kushte të këqija higjienike po përgatiste ushqim për vete dhe djalin e saj.
Edhe kështu jetohet…
Ajo thotë se në këtë dhomë të improvizuar duhet që t’i bëjë të gjitha që i duhen një familje, duke filluar nga përgatitja e ushqimit dhe fjetjes, të gjitha gjërat duhet lënë aty përfshirë edhe këpucët. Ajo thotë se verës është shumë e vështirë të qëndrohet aty nga të nxehtit ndërsa dimrit edhe më vështirë nga të ftohtit.
“Nuk kemi as banjo, i kemi të improvizuara, një ëc dhe një tjetër ku pastrohemi. Dimrit kur është shumë ftohtë është shumë e vështirë që të pastrohemi aty, sepse bën shumë ftohtë dhe po sëmuremi”, tregon Alidemaj.
E as dy familjet tjera që jetojnë në baraka të improvizuara në atë vend nuk i kanë kushtet më të mira. Ato kanë numër të madh anëtarësh dhe thonë se përballen më vështirësitë me elementare, ndërsa i bëjnë thirrje Komunës së Prishtinës që t’u ndihmojë për t’i sistemuar diku tjetër dhe të largohen nga ai vend njëherë e përgjithmonë.
I gjithë ky mjerim ndodhet pikërisht në Kryeqytetin e Kosovës, ku qendra e qytetit nuk ndodhet shumë larg, ndërsa në ato baraka atje është një realitet krejt ndryshe, një realitet i dhimbshëm.
Komuna e Prishtinës: Së shpejti hapet konkursi për 48 banesa për raste sociale
Zyra për Informim e Komunës së Prishtinës në një përgjigje elektronike për tesheshi.com, ka thënë se edhe rastet e këtyre familjeve i ka parasysh dhe se është duke ndërmarrë masa konkrete që të ua sigurojë vendet e banimit.
“Komuna e Prishtinës është e përkushtuar për zgjedhjen e të gjitha rasteve që kanë probleme me banim në Komunën e Prishtinë. Në këtë aspekt, shumë shpejt do të hapet konkursi për 48 banesa që janë të dedikuara për rastet sociale”, thuhet në përgjigje.
Zyra për Informim e Komunës thotë se të gjitha rastet e tilla do të trajtohen me prioritet dhe të gjitha kërkesat nga familjet në fjalë do të trajtohen në mënyrë të barabartë.
“Në vazhdimësi është duke u përgatitur plani edhe për banesa të tjera me qëllim të lehtësimit të jetesës së këtyre familjeve. Sikurse të gjitha familjet e tjera, edhe këto familje në fjalë do të trajtohen në mënyrë të barabartë dhe nëse i plotësojnë kriteret e kërkuara në bazë të ligjeve dhe rregulloreve në fuqi, atëherë do t’iu aprovohet kërkesa”, thuhet në përgjigjen e Komunës së Prishtinës. /tesheshi.com/
