Nga Bashkim Kastrati
Institucionet private shëndetësore shpesh konsiderohen si më profesionale se ato publike, ku mund të kryesh punë më lehtë, ku pritja është më e mirë dhe ku pacientët respektohen më shumë. Kjo e fundit edhe mund të jetë në krahasim me institucionet shëndetësore publike, por shërbimet jo në secilin rast dhe në secilën ordinancë janë më të mira, por kjo varet nga shërbimet medicinale që ofrojnë institucionet private shëndetësore.
Inspektorati Shëndetësore, i cili funksionon në kuadër të Ministrisë së Shëndetësisë, vetëm në nëntëmujorin e parë të këtij viti ka mbyllur 72 institucione private shëndetësore për shkak se ato nuk iu janë përmbajtur normave juridike dhe kanë bërë shkelje të ndryshme ligjore. Ndërsa në lidhje me këto veprime kundërligjore në nëntëmujorin e parë të këtij viti, janë bërë gjashtë kallëzime penale.
Mbyllja e këtyre institucioneve që ofronin shërbime medicinale në sektorin privat është bërë që nga mospajisja me liçencë apo mosvazhdimi i saj e deri tek abuzimet më banale.
Një nga rastet e tilla ka qenë kur një teknik medicinal është zënë nga Inspektorati Shëndetësor duke kryer punën e mjekut.
Sipas të dhënave të Inspektoratit Shëndetësor, dy gjoba janë shqiptuar për mosplotësim të dokumentacionit shëndetësor; dy për mosrespektim të Ligjit për Kontrollin e duhanit; dy për lëshim të çertifikatave shëndetësore për punësim (1 në privat); një ndalim i punës së profesionistit shëndetësor i cili punon pa liçencë; një për referim të pacientit në institucion shëndetësor privat; një për mosruajte të vulës nga mjeku; një ndaj profesionistit shëndetësor për përshkrim të raporteve mjekësore në kundërshtim me (doracaku për përshkrimin e dokumentacionit shëndetësor) Udhëzimit Administrativ; një ndaj profesionistit shëndetësor për mosplotësim të recetës së pacientit; një ndaj mjekut për mospërmbajtje të etikës mjekësore; ndërsa dy vendime janë shqiptuar pa gjobë; një për revokim të licencës dhe një për plotësim-ndryshim të vendimit të shkallës së parë.
Ekspertët e shëndetësisë thonë se me këto veprime rrezikohet seriozisht shëndeti i popullatës dhe se duhet marrë masa edhe më të ashpra ndaj atyre që abuzojnë me institucionet private shëndetësore dhe se ato duhet të mbikëqyren në mënyrë edhe më rigoroze, që të mos punojë asnjëra pa i respektuar ligjet në fuqi dhe pa marrë dhe respektuar licencën për shërbimet që i kryen.
Trend i rritjes së institucioneve shëndetësore ilegale
Sipas të dhënave që tesheshi.com i ka marrë në Inspektoratin Shëndetësor të Kosovës, ka një trend të rritjes së mbylljes së institucioneve private shëndetësore dhe rrjedhimisht ka edhe rritje të kallëzimeve penale ndaj këtyre institucioneve shëndetësore.
Zv.kryeinspektori Shëndetësor, dr. Shaban Osmanaj ka thënë për tesheshi.com se arsyet kryesore për ndalimin e ushtrimit të veprimtarisë shëndetësore kanë qenë se të gjitha këto Institucione Private Shëndetësore kanë vepruar në kundërshtim me nenin 42 të Ligjit Për Shëndetësi Nr 04/L-125 pa pasur autorizim ligjor(licencë).
“Të gjitha këto institucione private shëndetësore (IPSh) të cilat janë hasur duke punuar pa pasur autorizim ligjor; Inspektorati Shëndetësor ka lëshuar vendim me mbyllje të institucionit si dhe ka marrë masa dënim me gjobë për themeluesit e këtyre IPSh-ve”, thotë Osmanaj.
Ai thotë se ka pasur edhe raste kur IPSh-të kanë vazhduar punën edhe përkundër vendimit që ato mos ta ushtrojnë atë aktivitet. Rastet e tilla janë dërguar edhe në gjykatë.
“Në ato raste kur është vërejtur gjatë riinspektimeve që këto IPSh-ve nuk kanë respektuar vendimin e Inspektoratit Shëndetësor, pra kanë vazhduar të ushtrojnë veprimtari shëndetësore përkundër ndalesës së ushtrimit të veprimtarisë shëndetësore kemi ngritur kallëzim penal në instancat përkatëse”, theksoi Osmanaj.
Gjithashtu ka pasur 88 vendime të shkallës së parë që kanë rezultuar me 86 vendime të shkallës së parë me gjobë, në vlerë totale prej 161,800.00 euro. /tesheshi.com/
