Nga Blendi Gashi dhe Bashkim Kastrati
Federata e Taekwondos së Kosovës (FTK) aktualisht ka dy kryetarë, Gazmend Preniqin dhe Nuhi Gashin. I pari është pranuar juridikisht nga Ministria e Administratës Publike, kurse Nuhi Gashi që ka qenë deri më tani, i ka të gjitha dokumentacionet dhe vulën e kësaj federate. Ai ende njihet si kryetar edhe tek institucionet sportive evropiane dhe botërore si kryetar. Gjithashtu në web-faqen zyrtare të MKRS-së figuron emri i Nuhi Gashit si kryetar i FTK-së.
Ky i fundit thotë se janë bërë shkelje të shumta ligjore dhe procedurale gjatë zgjedhjes, së kryetarit të ri, siç e quan ai paralel.
Në shtator të këtij viti, Gazmend Preniqi është pranuar edhe në mënyrë institucionale si kryetar i Federatës së Taekwondos së Kosovës pas një kontesti që ka zgjatur rreth dy vite. Por sipas kryetarit të deritanishëm, Nuhi Gashi vendimi i Ministrisë së Administratës Publike, përkatësisht drejtorisë për OJQ, që të njohë Preniqin si kryetar është e njëanshme, favorizuese dhe joligjore. Ai thotë se kuvendi i mbajtur nga organizatorët që ai i quan paralelë ka pasur shkelje ligjore dhe për këtë arsye ka kërkuar nga Ministria e Administratës Publike (MAP) që të shfuqizohet ky vendim.
Gashi, përmes një letre drejtuar redaksisë së tesheshi.com ka prezantuar dokumente zyrtare ku shihet se federata që ai ka udhëhequr ka plotësuar të gjitha kriteret ligjore për t’u ri-licencuar.
“Kjo FTK me kryesinë e saj në krye me z. Nuhi Gashi dhe Enis Qafeleshi sekretar e cila është e njohur nga Federata Evropianë dhe ajo Botërore e Taekwondo-së, Komiteti Olimpik i Kosovës, Departament i Sportit i Ministrisë së Kulturës, Rinisë dhe Sportit (MKRS) të bëhet e pavlerë ndaj një grupi paralelist të cilët nga pesë klube vetëm tri janë funksionale dhe dy janë jo funksionale e të cilët si parashutistë zbritën në tokë dhe luftojnë për të marrë udhëheqjen e FTK-së, kjo FTK e cila vite më radhe ka përfaqësuar Kosovën nëpër arena të ndryshme ndërkombëtare siç janë kampionatet ballkanike, evropiane, botërore dhe Olimpiadën Evropiane, kjo FTK (me sportistët e vet) e cila për herë të parë arriti të sigurojë edhe medalje bronzi në Kampionatin Evropian të Klubeve me 2015”, thuhet në letrën e nënshkruar nga Nuhi Gashi.
Ai, përmes kësaj letre konsideron se është jashtë çdo norme ligjore dhe morale që për shkak se një ish-sekretar i FTK-së në vitin 2015, herë vetë dorëhiqet nga FTK, e herë kthehet, derisa Bordi i FTK-së merr vendim që ta shkarkojë këtë person jo stabil (ekziston edhe procesverbali) dhe për shkak të rebelimit të tij ky person mbledh një numër të paktë të klubeve jo anëtare në FTK dhe tentojnë të organizojnë të të ashtuquajturin kuvend të FTK-së me datë 21.04.2016, kuvend ky i cili për shkak se ishte grup paralelist nuk monitorohet nga Departamenti i Sportit/MKRS, as nga Komiteti Olimpik i Kosovës dhe as nga Ministria e Administratës Publike.
“Ky Kuvend gjithashtu, cili që nga fillimi i tij e deri në fund ka shkelje ligjore, falsifikime ku kanë mashtruar se gjoja kanë qenë shtatë klube pra, dikush është nënshkruar në emër të klubit joekzistent në atë takim (FTK posedon dëshminë me shkrim të këtij klubi për mos pjesëmarrje), certifikatën e FTK-së pranë Ministrisë së Administratës Publike, ku përfaqësues i saj ishte Nuhi Gashi, ndërrimin e statutit pasi që nuk ka të drejtën e ndërrimit të statutit askush përpos Kuvendit legjitim të FTK-së”, thotë Gashi, duke shtuar se qartë mund të shihet se si është manipuluar apo janë të dy palët manipuluese edhe Departamenti Ligjor MKRS-së, i cili guxon t’i lëshojë vitin e kaluar këtij grupi një opinion se gjoja që është në rregull dhe mendojnë se duhet të njihet nga MKRS ky kuvend.
“Habia e radhës është kur FTK ka bërë tri herë dorëzimin e dokumentacionit për ri-licencim me 12.05.2016, me 29.08.2016 dhe për here të tretë me 31.01.2017. Dokumentacioni i parë i yni është përgjysmuar nga zyrtaret e MKRS-së që ne dyshojmë dhe kemi arsye se Departamenti Ligjor ka bërë përgjysmimin e këtij dokumentacioni, dokumentacioni i dytë i datës: 29.08.2016 është zhdukur krejtësisht dhe këtë e kemi kuptuar vetëm pas 5 muajve, dhe për dokumentacionin e dorëzuar për herë të tretë nuk dimë asgjë për fatin a tij, por kaluan gati 8 muaj dhe ne nuk kemi një përgjigje se është apo nuk është dokumentacioni ynë në rregull, përderisa Udhëzimi Administrativ e thotë qartë se përgjigja duhet të kthehet brenda 15 ditëve pune, në të kundërtën federata konsiderohet e licencuar”, pretendon Gashi.
E gjithë kjo situatë e krijuar mund të ketë pasoja për federatën, por sidomos për garuesit e këtij sporti. Kjo për faktin se aktualisht në Federatën Evropiane dhe Botërore figuron emri i Nuhi Gashit si kryetar i cili është dërguar nga Komiteti Olimpik i Kosovës, prandaj mund të ketë probleme sa i përket përfaqësimit të sportistëve të Kosovës në garat e këtij sporti.
MAP po shqyrton ankesën e Nuhi Gashit
Në lidhje me këtë rast, Bajram Kosumi, Drejtor i Departamentit të Organizatave Joqeveritare (OJQ) ka thënë për tesheshi.com se ka pranuar një ankesë, por ende nuk është marrë ndonjë vendim përfundimtar.
“Departamenti i Organizatave Joqeveritare në Kuadër të Ministrisë së Administratës Publike, e ka aprovuar kërkesën për ndërrimi të përfaqësuesit të autorizuar të OJQ-së Taekwondos, njëra nga palët e pakënaqura në afat ligjor ka ushtruar ankesë. Tani lënda gjendet në Komisionin për Shqyrtimin e Ankesave të OJQ-ve, dhe është në procedure. Ma tepër lidhur me këtë, deri në vendimin meritor nga ana e komisionit nuk mund të komentojmë”, ka thënë Kosumi.
Tesheshi.com i ka dërguar pyetje edhe Ministrisë së Kulturës Rinisë së Sportit (MKRS), por edhe pas pritjes për një javë zyra për informim e kësaj ministrie nuk na ka kthyer përgjigje. Gjithashtu në lidhje me këtë rast i kemi dërguar pyetje edhe Gazmend Preniqit, por as ai nuk ka kthyer ndonjë përgjigje.
Ndryshe, Taekwondo në kuptimin etimologjik do të thotë mjeshtri luftarake me këmbë dhe duar. Taekwondo u referohet arteve marciale dhe së pari është zhvillua në Korenë Jugore gjatë viteve 1950 dhe 1960. U zbatua në ushtrinë koreane, po ashtu dhe organizata civile, shkolla dhe universitete. Është një prej arteve më sistematik dhe shkencor i traditave koreane që trajnon trupin dhe mendjen. U bë event olimpik që nga viti 2000 dhe është një nga sportet olimpike me më së paku lëndime. /tesheshi.com/
