Nga Bardha Nergjoni
Elbasani do të ketë për herë të parë në historinë e tij një azil për të moshuarit. Streha do të emërtohet “Azili i Kuvajtit për moshat e treta” si një investim i Fondit në ndihmë të të sëmurve me seli në Kuvajt.
I dëshirueshëm prej vitesh si një domosdoshmëri për të moshuar që jetojnë mes shumë vështirësish, por ende një tabu për mentalitetin e një brezi të shkuar, ky azil është gati, në pritje të konfirmimit të Ministrisë së Mirëqenies Sociale që do të mbështesë shërbimin në bashkëpunim me Bashkinë Elbasan. Streha është pikërisht në qendrën sociale Balashe, që funksionon prej shumë vitesh dhe i shërben shtesave në nevojë. Godina ku do të marrë jetë azili erdhi si dhuratë e bashkëpunimit italian mbi 15 vjet më parë.
Shumë të moshuar nga qendra Balashe kanë shprehur dëshirën për t’u strehuar në këto ambjente por përballë një gazetari, ngurrimi, mentaliteti dhe ndjesia e turpit i step dukshëm.
Ditët e fundit, duket se lajmi për hapjen e azilit është shpërndarë përtej Elbasanit. Fëmijët e një të moshuari në Bilisht kanë mbërritur pranë qendrës Balashe me kërkesën për t’a strehuar në ambjentet e reja. Interesi ka qenë i shumtë nga të vetmuar dhe të pa strehë, por për strehimin e 24 të moshuarve të parë do të ketë disa kritere.
Qendra Balashe pret tashmë të moshuar nga qyteti i Elbasanit ku marrin shërbime të ndryshme deri tek ushqimi, por ndjesia për një vendqëndrim komod ka rrokur mendjet e tyre. Ndërsa diskutojnë për azilin, një pjesë thonë se shumica kanë njerëz që i mbajnë, por ka edhe nga ata që nuk kanë ku qëndrojnë. Një 70-vjeçar thotë se jeton tek të afërm dhe jeta e tij është në kushte të mjerueshme. Varfëria ka bërë që ai të mos ketë as kushtet minimale të jetesës e jo shërbimet plus që ka nevojë një i moshuar. Edhe pse nuk ka një datë hapjeje të azilit, padurimi për të duket në sy edhe pse ndrojtjen për të folur e vë përballë mentalitetit që azilin e shikon si një braktisje.
Si një lajm i mirë që vjen nga bujaria, azili ka qenë një shqetësim i herëpasherëshëm i shoqërisë civile në Elbasan. Ndërhyrja erdhi pikërisht nga dëshira që shumë të moshuar të kenë mundësi të kalojnë vitet e jetës në ambiente të përshtatshme dhe me kushte optimale. Komuniteti mysliman në Elbasan ka qenë gjithmonë i ndjeshëm ndaj njerëzve në nevojë, ka ofruar mbështetje ndaj fëmijëve e sidomos ata jetimë, ka përkrahur njerëzit me nevoja të veçanta dhe ka kryer ndërhyrje të herëpasherëshme për familje të varfëra. Ky komunitet e mori kërkesën për strehën e të moshuarve dhe e bëri kauzë duke bashkëpunuar me fondin në ndihmë të të sëmurëve në Kuvajt. Një prej përfaqësuesve të myftinisë, Arben Ramkaj, e quan një investim të shumëpritur që më në fund është bërë realitet. “Idea për azilin lindi si kërkesë e Bashkisë Elbasan drejtuar komunitetit mysliman elbasanas. Ne morëm përsipër koordinimin me një OJF me seli në Kuvajt. Pasi u diskutua edhe me ambasadën e Kuvajtit, u ra dakort që të bëhej ky investim”, thekson ai.
“’Azili i Kuvajtit për moshat e treta’ u ndërtua nga ‘Fondi në ndihmë të të sëmurëve’ me seli në Kuvajt në bashkëpunim me qendrën Balashe dhe Bashkinë Elbasan. Projekti u realizua nga “Qendra për Bashkëpunim Ndërkombëtar” nën kujdesin e Myftinisë Elbasan e cila ishte dhe koordinatorja e këtij bashkëpunimi me Bashkinë Elbasan. Ky azil është i pari në llojin e vet dhe është bërë gati për 24 të moshuar që do të akomodohen së shpejti. Ka të gjitha kushtet optimale që kjo moshë të jetojë normalisht”. Por azili nuk do të jetë vetëm për 24 të moshuarit e parë. Shumë shpejt, Fondi do të bëjë të mundur ndërtimin e katit të katërt të objektit ku edhe do të strehohen edhe 24 të moshuar të tjerë. Ndërkohë që ambjentet janë gati, Ministrisë së Mirëqenies dhe Rinisë i lind detyra të miratojë organikën dhe përzgjedhjen e personave që do të jetojnë në këto ambiente. Shërbimet do t’i marrë përsipër ministria në bashkëpunim me Bashkinë Elbasan”, thotë Ramkaj, një prej të angazhuare fuqishëm në këtë inisiativë.
Sigurisht në mozaikun e shërbimeve, komiteti mysliman në Elbasan do të shtonte edhe këtë gur të rëndësishëm në respekt të jetës dhe të njerëzve që kanë më shumë nevojë për mbështetje. Ramkaj thotë se së fundi Myftina ka mbështetur edhe ekzaminimet falas të 150 personave nga një mjek italian.
“Komiteti mysliman në Elbasan ka një sërë aktivitetesh në shërbim të nevojtarëve. Ka sektorin për mbrojtjen e fëmijëve, të shërbimit social, të mbështetjes së njerëzve me aftësi të veçanta si dhe së fundi azilin për të moshuarit. Ne po mbështesim njerëzit në nevojë edhe për shërbimet mjekësore. Pak kohë më parë kemi ndërhyrë nëpërmjet ortopedit italian duke ofruar falas ekzaminimet në klinikën ‘Pro life për më shumë se 150 qytetarë”, sqaron Ramkaj.
Azili i të moshuarve nuk do të jetë thjesht një vend strehimi. Ndërtimi dhe arredimi i kuzhinës, i dhomave të gjumit, ambienteve shplodhëse, bibliotekës, i qendrës shëndetësore etj. sigurojnë shërbimin total ndaj të moshuarve të vetmuar që do të marrin konfirmimin për të qenë banorët e parë.
Gjithçka duket gati në pritje të konfirmimit të Ministrisë së Mirëqenies që i hap rrugë këtij shërbimi aq shumë të kërkuar si një domozdoshmëri e shprehjes së kujdesit ndaj atyre që kanë më shumë nevojë dhe sidomos respekt, për të kuptuar se nuk janë vetëm dhe meritojnë të jetojnë normalisht edhe në pleqëri. /tesheshi.com/
