E çuditshme ajo që ka ndodhur me ekipin roman të Lacios, për të cilin luan dhe portieri i kombëtares shqiptare, Berisha. Vetëm dy ditë pasi ka nënshkruar një kontratë me argjentinasin Marcelo Bielsa, i cili do ta drejtonte Lacion në sezonin që pritet të nisë së shpejti, është përballur me dorëheqjen e tij.
Bielsa pritej ta niste punën ditën e nesërme më 9 korrik, diçka që tashmë nuk do të ngjasë. “Kemi marrë dorëheqjen e papritur të Marcelo Bielsa-s,” thotë një njoftim i klubit të Lacio-s.
Ndaj trajnerit 60-vjeçar është mësuar se do të nisë një procedim ligjor nga ana e klubit, për shkelje të hapur të angazhimeve të ndërmarra me kontratën e nënshkruar.
Jo të qeta kanë qenë dhe periudhat që ka kaluar Bielsa në ekipe të tjera. Ai më parë ka drejtuar Espanjolin, po ashtu për një periudhë mjaft të shkurtër, disamujore, Atletiko Bilbaon e Olimpikun e Marsejës, ndërsa në nivel përfaqësuesesh ka qenë në krye të Argjentinës e Kilit.
Edhe dorëheqja e tij sugjerohet të jetë për shkak të stolit të Argjentinës, të mbetur bosh pas largimit të Tata Martino-s.
Simone Inzaghi do ta luajë rolin e trajnerit së paku tani për tani te Lacio, gjë të cilën e bëri dhe më herët në sezonin e shkuar, pas shkarkimit të Stefano Pioli-t. /tesheshi.com/
